शिरूरमध्ये मृत गायीवर अंत्यसंस्कार; नगरसेवक सागर नरवडे यांचा पुढाकार

शिरूर { डेली न्यूज पोस्ट टीम, 24}शहरातील करंजुले वस्ती येथे मृतावस्थेत आढळलेल्या गायीवर   अंत्यसंस्कार करून मानवतेचा आदर्श ठेवण्यात आला. या साठी नगरसेवक सागर नरवडे यांनी पुढाकार घेत प्रशासनाच्या मदतीने ही कार्यवाही पार पाडली.

प्रभाग क्रमांक ७ मधील करंजुले वस्ती येथे एक गाय मृत अवस्थेत आढळून आल्याची माहिती नागरिकांनी नरवडे यांना दिली. त्यानंतर त्यांनी तत्काळ घटनास्थळी धाव घेत नगरपरिषदेचे संबंधित अधिकारी, स्वच्छता विभाग व स्वच्छता निरीक्षक दत्तात्रय बर्गे यांना माहिती दिली. यानुसार स्वच्छता कर्मचारीही घटनास्थळी दाखल झाले.

मृत गायीबाबत पुढील कार्यवाहीबाबत चर्चा सुरू असताना, नरवडे यांनी गायीवर हिंदू धर्मशास्त्रानुसार अंत्यसंस्कार करण्याचा प्रस्ताव मांडला. प्रशासनाच्या सहकार्याने गायीला पांजरपोळ येथे नेऊन विधीपूर्वक अंत्यसंस्कार करण्यात आले.

या प्रसंगी बोलताना नरवडे म्हणाले, “गाय ही हिंदू धर्मात ‘गोमाता’ म्हणून पूजनीय मानली जाते. त्यामुळे तिच्या मृत्यूनंतरही सन्मानपूर्वक अंत्यसंस्कार होणे आवश्यक आहे. नागरिकांकडून माहिती मिळताच हे कर्तव्य पार पाडण्याचा प्रयत्न केला.”

या उपक्रमामुळे परिसरातील नागरिकांमध्ये समाधान व्यक्त करण्यात आले असून, सामाजिक संवेदनशीलतेचे उदाहरण म्हणून या घटनेकडे पाहिले जात आहे.