सोशल मीडियाच्या युगात किल्ल्यांचे महत्त्व नव्या पिढीपर्यंत पोहोचविण्याचा मातोश्री प्रतिष्ठानचा उपक्रम

शिरूर {डेली न्यूज पोस्ट टीम -24}सध्याच्या स्पर्धात्मक आणि सोशल मीडियाने व्यापलेल्या युगामध्ये वाढत असलेल्या तरुण पिढीला आपल्या वैभवशाली इतिहासाची, किल्ल्यांच्या परंपरेची ओळख व्हावी तसेच भविष्यातील पिढीने किल्ल्यांच्या संवर्धनासाठी पुढाकार घ्यावा, या उद्देशाने मातोश्री प्रतिष्ठान दरवर्षी किल्ले स्पर्धेचे आयोजन करत असल्याचे मत मातोश्री प्रतिष्ठानचे अध्यक्ष अभिजीत आंबेकर यांनी व्यक्त केले.

मातोश्री कला, क्रीडा व शैक्षणिक संस्थेच्या वतीने दिवाळीनिमित्त आयोजित करण्यात आलेल्या या किल्ले स्पर्धेला नागरिकांचा उत्स्फूर्त प्रतिसाद लाभला. या स्पर्धेत ६० पेक्षा अधिक स्पर्धकांनी सहभाग नोंदविला. या स्पर्धेचे वैशिष्ट्य म्हणजे विजेत्यांचे बक्षीस वितरण थेट त्यांच्या घरी जाऊन करण्यात आले. प्रथम पाच क्रमांक मिळविणाऱ्या स्पर्धकांच्या निवासस्थानी जाऊन त्यांना सन्मानचिन्ह व रोख रक्कम देऊन गौरविण्यात आले.

यावेळी मातोश्री प्रतिष्ठानचे पदाधिकारी शैलेश जाधव, सतीश केदारी, ओंकार भोसले यांच्यासह अन्य कार्यकर्ते उपस्थित होते.

मातोश्री प्रतिष्ठान गेल्या २० वर्षांपासून सातत्याने किल्ले स्पर्धांचे आयोजन करत असून, या उपक्रमाच्या माध्यमातून मोबाईल व सोशल मीडियामध्ये गुंतलेल्या आजच्या पिढीला आपल्या देशाच्या वैभवशाली किल्ल्यांची माहिती मिळावी, त्यांचे ऐतिहासिक महत्त्व समजावे आणि किल्ल्यांच्या जतन व संवर्धनासाठी प्रेरणा मिळावी, हा प्रमुख उद्देश असल्याचे शैलेश जाधव यांनी सांगितले. आपले किल्ले ही देशाची शान असून, ते कायम तरुण पिढीसाठी प्रेरणास्थान राहावेत यासाठी मातोश्री प्रतिष्ठान दरवर्षी अशा उपक्रमांचे आयोजन करणार असल्याचेही त्यांनी स्पष्ट केले.

या स्पर्धेत

साई संदीप लंघे यांनी प्रथम क्रमांक पटकावून रोख रक्कम व सन्मानचिन्ह मिळविले.

अर्चना पाथरकर यांनी द्वितीय क्रमांक,

साई श्रीकांत धोत्रे यांनी तृतीय क्रमांक,

रियांश पाचर्णे यांनी चतुर्थ क्रमांक तर

चेतन संघवी यांनी पाचवा क्रमांक पटकाविला.

स्पर्धेत सहभागी झालेल्या प्रत्येक स्पर्धकाला प्रोत्साहन म्हणून मेडल देण्यात येणार आहे.

या कार्यक्रमाचे स्वागत सतीश केदारी यांनी केले, सूत्रसंचालन शैलेश जाधव यांनी तर आभार ओंकार भोसले यांनी मानले.