शिरूर तालुक्यातील एकावर एमपीडीए अंतर्गत कारवाई

शिरूर { डेली न्यूज पोस्ट टीम 24}आगामी स्थानिक स्वराज्य संस्थांच्या निवडणुकांच्या पार्श्वभूमीवर पुणे ग्रामीण पोलीस दलाने गुन्हेगारीविरोधात कडक भूमिका घेतली असून, शिरूर तालुक्यातील एका सराईत गुन्हेगारास एमपीडीए अंतर्गत स्थानबद्ध करण्यात आले आहे.

याबाबत माहिती देताना पोलीस निरीक्षक संदेश केंजळे यांनी सांगितले की शिरूर पोलीस ठाण्याच्या हद्दीतील दीपक बबन गुंजाळ (वय ३३, रा. गोलेगाव रोड, शिरूर ता. शिरूर जि. पुणे ) याच्याविरुद्ध ही कारवाई करण्यात आली आहे. गुंजाळ याच्याविरुद्ध अवैध अग्निशस्त्र बाळगणे, घातक हत्यारांनी मारहाण, शिवीगाळ व दमदाटी अशा स्वरूपाचे तीन गंभीर गुन्हे दाखल आहेत.

गुंजाळच्या वाढत्या गुन्हेगारी कारवायांचा आढावा घेऊन, पोलीस निरीक्षक संदेश केंजळे यांनी त्याच्याविरुद्ध MPDA अंतर्गत कारवाईचा प्रस्ताव पुणे ग्रामीण पोलीस अधीक्षकांकडे सादर केला होता. त्या प्रस्तावास मान्यता देत, पुणे जिल्हाधिकारी तथा जिल्हादंडाधिकारी जितेंद्र डुडी यांनी १२ डिसेंबर २०२५ रोजी गुंजाळ यास एमपीडीए कायद्यानुसार स्थानबद्ध करण्याचे आदेश दिले.

यानंतर पोलीस निरीक्षक संदेश केंजळे, स्थानिक गुन्हे शाखा व शिरूर पोलीस ठाण्याच्या पथकाने १३ डिसेंबर २०२५ रोजी गुंजाळ यास ताब्यात घेतले. त्याला पुढील कारवाईसाठी मध्यवर्ती कारागृह, नागपूर येथे दाखल करण्यात आले आहे.

ही कारवाई पोलीस अधीक्षक संदीप सिंह गिल, अप्पर पोलीस अधीक्षक रमेश चोपडे आणि उपविभागीय पोलीस अधिकारी प्रशांत ढोले यांच्या मार्गदर्शनाखाली पार पडली. पोलीस निरीक्षक संदेश केंजळे,स्थानिक गुन्हे शाखेचे पोलीस निरीक्षक अविनाश शिळीमकर यांचेही या कारवाईत सहकार्य लाभले.पोलीस उपनिरीक्षक शुभम चव्हाण, शिरुर पोलीस स्टेशन, सहाय्यक पोलीस उपनिरीक्षक महेश बनकर, पो. हवा मंगेश थिगळे, तुषार पंदारे, संजय जाधव, स्थानिक गुन्हे शाखा, पुणे ग्रामीण, सहा. पो फौजदार शरद गावडे, पो.हवा परशराम सांगळे, पोलीस अंमलदार सचिन भोई, नितेश थोरात, गणेश गोसावी, विजय शिंदे, निखील रावडे, अंबादास थोरे, निरज पिसाळ, रघुनाथ हळनोर, आदीनी या कारवाईत सहभाग घेतला.