उपमुख्यमंत्री अजित दादा पवार यांच्या आकस्मित एक्झिट मुळे शिरूरकरांचे डोळे पाणावले,

शिरूर { डेली न्यूज पोस्ट टीम 24}शिरूर करांशी विशेष स्नेह जपणारे राज्याचे उपमुख्यमंत्री अजितदादा पवार यांच्या निधना नंतर शिरूरकरांच्या भावना अनावर झाल्या.त्यांना आदरांजली वाहताना अनेकांच्या अश्रूच्या बांध फुटला.

पुणे जिल्ह्यातील शिरूर विधानसभा हा राष्ट्रवादी काँग्रेसचा बालेकिल्ला राहिल्या आहे . साहजिकच शिरूर तालुक्यातील लहानांपासून मोठ्या नेत्यापर्यंत कार्यकर्त्यांपर्यंत अजित दादांचा थेट संपर्क व संवाद राहिला आहे. अनेक कार्यकर्त्यांच्या नेत्यांच्या सुखदुःखात अजित दादा पवार सहभागी होण्यासाठी शिरूर तालुक्यात आवर्जून येत. शिरूर तालुक्याच्या विविध विकास कामांची पायाभरणी अजितदादा पवार यांच्या मार्गदर्शनाखाली झाली. काही महिन्यापूर्वी झालेल्या शिरूर नगर परिषदेच्या सार्वत्रिक निवडणुकीच्या निमित्ताने अजित दादा पवार हे शिरूर येथे जाहीर सभेच्या निमित्ताने आले होते ही शिरूर मधील त्यांची अखेरची सभा असेल याची कल्पना त्यावेळेस कोणास नव्हती. शिरूरच्या विकासाचा रोड मॅप आपल्या सभेत त्यांनी भाषणाद्वारे मांडला. शिरूरच्या नगर परिषदेमध्ये राष्ट्रवादी काँग्रेसची सत्ता ही आली व नगराध्यक्ष म्हणून ऐश्वर्या पाचरणे याही निवडून आल्या. शिरूर शहराच्या विविध विकास कामांच्या संदर्भामध्ये अजितदादा पवार यांनी लक्ष घातले होते साहजिकच अजितदादांच्या अचानक झालेल्या एक्झिट मुळे शिरूरच्या राजकीय क्षेत्रात मोठी पोकळी निर्माण झाली आहे.

अजितदादा पवार यांच्या निधनाचे वृत्त समजल्यावर शिरूर शहरातील मुख्य बाजारपेठ असलेल्या कापड बाजार हलवाई चौक परिसर आडत बाजार, शिरूर बसस्थानक परिसरासह उपनगरामधील दुकाने बंद ठेवून अजितदादा पवार यांना आदरांजली वाहण्यात आली. शिरूर शहर परिसरातील विविध शाळांमधून ही उपमुख्यमंत्री अजित दादा पवार यांना आदरांजली वाहण्यात आली.कापड बाजार मधील पाचकंदील चौकात शोकसभेचे आयोजन करण्यात आले होते. अजितदादांच्या निधनाने अनेक कार्यकर्त्यांना त्याचबरोबर सर्वसामान्य नागरिकांना त्यांच्या आठवणीने अश्रू अनावर झाले होते.