शिरूरच्या लेकीचा गौरव; पुण्याचे महापौर मंजुषा नागपुरे यांच्या शिरूर येथे १४ फेब्रुवारी रोजी नागरी सत्कार

शिरूर { डेली न्यूज पोस्ट टीम 24 }मंजुषा दीपक नागपुरे यांची  पुण्याचा महापौरपदी निवडीबद्दल शिरूर येथे त्यांचा भव्य नागरी सत्कार शनिवारी (१४ फेब्रुवारी) आयोजित करण्यात आला आहे. शिरूर नगरीतून घडलेली ही नेतृत्वकथा आता पुण्याच्या राजकारणात महत्त्वाची ठरली असून, शहरात अभिमानाचे वातावरण आहे.

स्व. यशवंतराव चव्हाण चौक, डंबेनाला (ता. शिरूर, जि. पुणे) येथे सकाळी १०.३० वाजता कार्यक्रम होणार आहे. कार्यक्रमाच्या अध्यक्षस्थानी ज्येष्ठ समाजसेवक अण्णासाहेब हजारे राहणार असून नगराध्यक्षा ऐश्वर्याताई अभिजीत पाचर्णे यांची प्रमुख उपस्थिती असेल. प्रमुख पाहुणे म्हणून खासदार डॉ. अमोल कोल्हे , आमदार माऊली कटके, म्हाडाचे सभापती शिवाजीराव आढळराव, माजी आमदार अशोक पवार, उद्योगपती प्रकाश धारीवाल, जनता दल प्रदेशाध्यक्ष नाथाभाऊ शेवाळे, भाजप तालुकाध्यक्ष राहुल पाचर्णे आदी मान्यवर उपस्थित राहणार आहेत.

निवडीमागील पार्श्वभूमी

पुणे महानगरपालिका निवडणुकीत भारतीय जनता पक्षाला स्पष्ट बहुमत मिळाल्यानंतर यंदाचे महापौरपद सर्वसाधारण महिला गटासाठी राखीव होते. त्यामुळे या पदासाठी उत्सुकता निर्माण झाली होती. अखेर शिरूरची कन्या मंजुषा नागपुरे यांची निवड जाहीर होताच शहरात जल्लोष साजरा करण्यात आला.

शिक्षण आणि जडणघडण

पूर्वाश्रमीच्या मंजुषा परदेशी यांचे शिक्षण शिरूरमधील चांदमल ताराचंद बोरा महाविद्यालय येथे झाले. वाणिज्य शाखेची पदवी संपादन केल्यानंतर त्यांनी काही काळ नोकरीही केली. सर्वसामान्य कुटुंबात वाढलेल्या नागपुरे या बेबी उर्फ माया परदेशी व रतनसिंग परदेशी यांच्या कन्या होत. धार्मिक व सामाजिक कार्याचा वारसा त्यांना घरातूनच लाभला.

राजकीय वाटचाल

सिंहगड रोड परिसरातून त्या सलग तिसऱ्यांदा नगरसेवक म्हणून निवडून आल्या आहेत. यंदा त्यांची बिनविरोध निवड झाली होती. स्थानिक प्रश्नांवर सातत्याने भूमिका मांडत त्यांनी जनसंपर्क मजबूत ठेवला. महापौरपदाची घोषणा होताच शिरूरमधील यशवंतराव चव्हाण चौकात नागरिकांनी एकत्र येत आनंद व्यक्त केला.

यशवंतराव चव्हाण सामाजिक, शैक्षणिक प्रतिष्ठान व डंबेवाला मित्र मंडळ यांच्या वतीने आयोजित या सत्कार सोहळ्यास नागरिकांनी मोठ्या संख्येने उपस्थित राहावे, असे आवाहन आयोजकांनी केले आहे. गावातून महानगरापर्यंत मजल मारणाऱ्या या लेकीचा प्रवास अनेकांसाठी प्रेरणादायी ठरत असल्याची भावना व्यक्त होत आहे.