🟠 शिवजयंतीनिमित्त शिरूरमध्ये सांस्कृतिक पर्व; व्याख्यान, स्पर्धा आणि भव्य मिरवणूक

शिरूर { डेली न्यूज पोस्ट टीम 24}: शहरात शिवजयंतीनिमित्त चार दिवस विविध सांस्कृतिक कार्यक्रमांची मेजवानी रंगणार आहे. सह्याद्री प्रतिष्ठान यांच्या वतीने या कार्यक्रमांचे आयोजन करण्यात आले असून, गेल्या काही वर्षांपासून आगळ्या-वेगळ्या उपक्रमांतून शिवजयंती साजरी करण्याची परंपरा यंदाही कायम ठेवण्यात आली आहे.

सोमवारी (दि. १६) छत्रपती शिवाजी महाराज यांच्या विचारांवर प्रा. नितीन बानगुडे पाटील यांचे प्रेरणादायी व्याख्यान होणार आहे. शिवचरित्रातील राष्ट्रनिर्माणाची भूमिका आणि तरुणाईसाठीचे संदेश यावर ते मार्गदर्शन करणार आहेत.

मंगळवारी (दि. १७) शहर व पंचक्रोशीतील शालेय विद्यार्थ्यांसाठी नृत्य स्पर्धेचे आयोजन करण्यात आले आहे. विद्यार्थ्यांना शिवकालीन संस्कृती आणि इतिहासाशी जोडणारा हा उपक्रम ठरणार आहे.Ò

बुधवारी (दि. १८) ‘रणी फडकती लाखो झेंडे’ हे २५ कलाकारांचे भव्य शिवनाट्य सादर होणार आहे. शिवकालीन पराक्रम आणि स्वराज्याची गाथा रंगमंचावर उभी करण्याचा प्रयत्न या नाट्यातून होणार आहे.

गुरुवारी (दि. १९) सायंकाळी शहरातून भव्य मिरवणूक काढण्यात येणार असून, ‘महातांडव अघोरी’ हा विशेष आकर्षणाचा कार्यक्रम सादर केला जाणार आहे.

या सर्व कार्यक्रमांना नागरिकांनी मोठ्या संख्येने उपस्थित राहावे, असे आवाहन सह्याद्री प्रतिष्ठानचे कुणाल काळे यांनी केले आहे.

शिरूरमध्ये शिवजयंतीनिमित्त सांस्कृतिक आणि ऐतिहासिक उत्साहाचे वातावरण निर्माण झाले असून, नागरिकांमध्ये मोठी उत्सुकता दिसून येत आहे.