रामलिंग परिसरात दुहेरी चोरी; दागिने व दुचाकी लंपास

शिरूर { डेली न्यूज पोस्ट टीम 24}: महाशिवरात्रीच्या यात्रेचा दिवशी रामलिंग परिसरात रविवारी (दि. १५) दुपारच्या सुमारास दुहेरी चोरीची घटना घडली. मंदिर परिसरातून एका महिलेच्या मंगळसूत्रातील सोन्याच्या वाट्या चोरट्याने लंपास केल्या, तर बाहेरील पार्किंगमधून दुचाकी चोरीस गेल्याची नोंद शिरूर पोलीस स्टेशन येथे करण्यात आली आहे.

पहिल्या घटनेत सौ. सुमंगला आनंद आरगीडडी (वय ४५, रा. बाबुरावनगर, शिरूर) यांनी दिलेल्या फिर्यादीनुसार, दुपारी १.३० वाजण्यापूर्वी मंदिर परिसरात त्यांच्या मणी मंगळसूत्रातील प्रत्येकी चार ग्रॅम वजनाच्या दोन सोन्याच्या वाट्या (सुमारे ४० हजार रुपये किंमत) अज्ञात चोरट्याने चोरून नेल्या. याप्रकरणी गुन्हा क्रमांक १२९/२०२६ भा.न्या.सं. कलम ३०३(२) प्रमाणे दाखल करण्यात आला असून, तपास पो.हवा. आगलावे करीत आहेत.

दुसऱ्या घटनेत निलेश राजेंद्र मोरे (वय ३४, रा. वांबोरी, ता. राहुरी, जि. अहिल्यानगर) यांची पांढऱ्या रंगाची होंडा अॅक्टिव्हा (क्र. एमएच १७ सीडी ८४६८) ही दुचाकी दुपारी २.३० वाजण्यापूर्वी मंदिराच्या बाहेरील पार्किंगमधून अज्ञात चोरट्याने लंपास केली. सुमारे ५० हजार रुपये किंमतीची ही दुचाकी चोरीस गेल्याची नोंद करण्यात आली आहे. तपास पो.हवा. बनकर यांच्याकडे सोपविण्यात आला आहे.

दोन्ही गुन्ह्यांची नोंद दाखल अंमलदार पो.हवा. जाधव (ब.नं. २२२९) यांनी केली असून पोलीस निरीक्षक केंजळे यांच्या मार्गदर्शनाखाली पुढील तपास सुरू आहे.

 एकाच दिवशी घडलेल्या या दुहेरी चोरीमुळे नागरिकांमध्ये चिंतेचे वातावरण निर्माण झाले आहे.