शिवनामाच्या गजरात घुमणार घोडनदी परिसर ; लाखो भाविकांच्या स्वागतासाठी शिरूर सज्ज

शिरूर { डेली न्यूज पोस्ट टीम 24}
शिरूर–घोडनदी परिसरात भक्तीचा महासागर उसळण्याची चाहूल लागली आहे. आंतरराष्ट्रीय ख्यातीचे कथावाचक पं. आचार्य प्रदीपजी मिश्रा (सीहोरवाले) यांच्या अमृतवाणीमधून रंगणाऱ्या भव्य श्री शिव महापुराण कथेच्या आयोजनासाठी आता शिरूरकर सज्ज झाले आहेत.

दि. २४ फेब्रुवारी ते 2 मार्च २०२६ या कालावधीत दररोज दुपारी १ ते ४ या वेळेत हा अध्यात्मिक सोहळा पार पडणार आहे.
या भव्य धार्मिक कार्यक्रमासाठी लाखोंच्या संख्येने भाविक येणार असल्याने नियोजनाच्या दृष्टीने महत्त्वपूर्ण बैठक कार्यक्रमस्थळी पार पडली. मुख्य आयोजक प्रसिद्ध उद्योगपती व माजी नगराध्यक्ष प्रकाश धारीवाल, उद्योगपती आदित्य धारीवाल, नगराध्यक्षा ऐश्वर्या पाचर्णे, जिल्हा नियोजन समिती सदस्य राहुल पाचर्णे,पोलीस निरीक्षक संदेश केंजळे, लोकशाही क्रांती आघाडीचे अध्यक्ष रवींद्र धनक, माजी सरपंच अरुण घावटे, माजी नगरसेवक विजय दुगड, सुनील धाडीवाल, विनोद धाडीवाल, जिल्हा परिषदेचे सदस्य राजेंद्र गावडे , लक्ष्मीकांत खाबिया, आबासाहेब सरोदे यांच्यासह शिवसेवा मंदिर ट्रस्ट व रामलिंग मंदिर ट्रस्टचे विश्वस्त, आजी-माजी नगरसेवक, विविध संस्था, महिला मंडळे आणि गणेश मंडळांचे पदाधिकारी मोठ्या संख्येने उपस्थित होते.
या धार्मिक सोहळ्याचे आयोजन पी. आर. धारीवाल फाउंडेशनच्या वतीने करण्यात आले आहे.
“श्री शिव महापुराण कथा हा केवळ धार्मिक कार्यक्रम नसून समाजाला सदाचार, संयम आणि भक्तीचा मार्ग दाखवणारा उपक्रम आहे. या कथेमुळे भाविकांना अध्यात्मिक प्रेरणा आणि सकारात्मक ऊर्जा मिळेल,” असे भावनिक प्रतिपादन प्रकाश धारीवाल यांनी केले. हा कार्यक्रम सर्वांचा असून तो यशस्वी करण्यासाठी सर्वांनी पुढाकार घ्यावा, असे आवाहनही त्यांनी केले.
लाखोंच्या भाविकांच्या उपस्थितीच्या पार्श्वभूमीवर स्वयंसेवकांच्या विविध समित्या गठीत करण्यात येत आहेत. भोजन, स्वच्छता, आदरातिथ्य, पार्किंग, वाहतूक अशा स्वतंत्र समित्यांद्वारे नियोजनबद्ध व्यवस्था उभारली जात आहे. स्वयंसेवक म्हणून काम करण्याची इच्छा असणाऱ्यांनी पुढे यावे, असे आवाहन माजी नगरसेवक विजय दुगड यांनी केले.
सुमारे ३० एकरांहून अधिक जागेवर उभारण्यात आलेला भव्य आणि सुसज्ज मंडप सध्या भाविकांच्या आकर्षणाचे केंद्र ठरत आहे. मुख्य मंडपाबरोबरच प्रसादासाठी स्वतंत्र सुसज्ज प्रसादलय मंडपही उभारण्यात येत आहे. संपूर्ण परिसरात शिवनामाचा गजर, भव्य सजावट आणि शिस्तबद्ध नियोजनामुळे एक आगळावेगळा आध्यात्मिक सोहळा अनुभवण्याची संधी शिरूरकरांना लाभणार आहे.
शिरूर शहरात प्रथमच इतक्या मोठ्या प्रमाणावर धार्मिक कार्यक्रम होत असून लाखो भाविकांचे स्वागत करण्यासाठी शिरूरकर आणि संयोजक कटीबद्ध झाले आहेत. आता अवघा परिसर ‘हर हर महादेव’च्या जयघोषाने दुमदुमणार आहे.