शिरूरमध्ये १०० खाटांच्या उपजिल्हा रुग्णालयासाठी आंदोलनाचा इशारा

शिरूर { डेली न्यूज पोस्ट टीम 24)शिरूर शहरासाठी अत्यावश्यक ठरणाऱ्या १०० खाटांच्या उपजिल्हा रुग्णालयाच्या उभारणीसाठी आवश्यक जागा उपलब्ध करून देण्याबाबत प्रशासनाकडून होत असलेल्या दिरंगाईविरोधात भाजप महिला आघाडी आक्रमक झाली आहे. चुकीचा व अपूर्ण प्रस्ताव सादर करणाऱ्या संबंधित अधिकाऱ्यांवर शिस्तभंगाची कारवाई करावी तसेच दुरुस्त व परिपूर्ण प्रस्ताव तातडीने सादर करावा, अशी मागणी करण्यात आली आहे. अन्यथा दि. ४ मे २०२६ पासून बेमुदत उपोषण आंदोलन छेडण्याचा इशाराही देण्यात आला आहे.

या संदर्भात जिल्हाधिकारी, पुणे तसेच तहसीलदार, पोलिस स्टेशन शिरूर यांना निवेदन देण्यात आले. दि. ११ सप्टेंबर २०२५ पासून सातत्याने पाठपुरावा करूनही अद्यापपर्यंत योग्य प्रस्ताव सादर न झाल्याने प्रशासनाच्या कार्यपद्धतीवर प्रश्नचिन्ह उपस्थित होत असल्याचे निवेदनात नमूद करण्यात आले आहे. उलट वरिष्ठांकडे चुकीचा प्रस्ताव पाठवण्यात आल्यामुळे ही बाब अधिक गंभीर बनली आहे.

दरम्यान, अलीकडेच शिरूर शहरात एका गरीब गर्भवती महिलेला वेळेत उपचार न मिळाल्यामुळे रस्त्यावरच प्रसूती करावी लागल्याची दुर्दैवी घटना घडली. या घटनेमुळे शहरातील आरोग्य व्यवस्थेची दयनीय स्थिती पुन्हा एकदा समोर आली असून नागरिकांमध्ये संताप व्यक्त होत आहे.

शिरूर शहर व परिसरासह पुणे–नगर महामार्गावर वारंवार अपघात व आपत्कालीन वैद्यकीय परिस्थिती निर्माण होत असतात. अशा वेळी तातडीने उपचार मिळण्यासाठी उपजिल्हा रुग्णालयाची नितांत गरज असल्याचेही निवेदनात अधोरेखित करण्यात आले आहे.

यावेळी नायब तहसीलदार प्रकाश मुसळे यांच्या मार्फत जिल्हाधिकारी यांना निवेदन देण्यात आले. या प्रसंगी भाजप महिला आघाडीच्या शहराध्यक्षा प्रिया बिरादार, उपाध्यक्षा सृष्टी करंजुले, निलू शर्मा कविता परदेशी भारती शहाणे मिरा परदेशी यांच्यासह मोठ्या संख्येने महिला कार्यकर्त्या उपस्थित होत्या.