पती-पत्नीतील वाद चिघळला; परस्परविरोधी गुन्हे दाखल

शिरूर { डेली न्यूज पोस्ट टीम -24}शिरूर शहरात पती-पत्नीतील कौटुंबिक वाद चिघळून परस्परांविरोधात गंभीर गुन्हे दाखल झाल्याची घटना समोर आली आहे. पोटगीच्या वादातून दोघांनी एकमेकांवर मारहाणीचे आरोप करत शिरूर पोलीस ठाण्यात तक्रारी नोंदवल्या आहेत.
पोलीसांनी दिलेल्या माहितीनुसार फिर्यादी यांनी आपल्या पती यांच्याविरोधात गुन्हा दाखल केला आहे. २८ एप्रिल रोजी दुपारी अडीचच्या सुमारास रामलिंग रोडवरील श्री हाइट्ससमोर पोटगीच्या कारणावरून वाद झाल्यानंतर पतीने लोखंडी फायटरने मारहाण करून जखमी केल्याचा आरोप फिर्यादीने केला आहे. तसेच शिवीगाळ व जीवे मारण्याची धमकी दिल्याचेही तक्रारीत नमूद आहे.
दरम्यान, याच घटनेप्रकरणी फिर्यादीचे पती यांनीही स्वतंत्र फिर्याद दाखल केली असून, पत्नी व दोन अनोळखी इसमांविरोधात गुन्हा नोंदवण्यात आला आहे. पत्नीने चर्चेच्या बहाण्याने बोलावून घेतल्यानंतर दोन अनोळखी व्यक्तींना मारहाण करण्यास प्रवृत्त केल्याचा आरोप करण्यात आला आहे. संबंधित इसमांनी वायर व बेल्टच्या साहाय्याने मारहाण करून दुखापत केल्याचे फिर्यादीत नमूद आहे.
या प्रकरणी शिरूर पोलीस स्टेशन येथे गु.र.नं. ३७७/२०२६ व ३७६/२०२६ असे परस्परविरोधी गुन्हे भारतीय न्याय संहितेच्या विविध कलमांन्वये दाखल करण्यात आले आहेत.
पोलीस निरीक्षक संदेश केंजळे यांच्या मार्गदर्शनाखाली पुढील तपास सुरू आहे.