शिरूरला उपजिल्हा रुग्णालयासाठी प्रिया बिरादार यांचे बेमुदत उपोषण

शिरूर{ डेली न्यूज पोस्ट टीम 24},: शहरातील प्रलंबित नागरी सुविधांच्या प्रश्नांवर प्रशासनाचे लक्ष वेधण्यासाठी भाजप महिला आघाडीच्या शिरूर शहराध्यक्षा प्रिया बिरादार या सोमवारपासून बेमुदत उपोषणास बसणार आहेत. शिरूर तहसील कार्यालयासमोर सकाळी ११ वाजता या आंदोलनास प्रारंभ होणार असून, विविध समाजोपयोगी मागण्यांसाठी हा लढा उभारण्यात येत आहे.

शहरात १०० खाटांच्या उपजिल्हा रुग्णालयासाठी आवश्यक जागेचा परिपूर्ण प्रस्ताव तातडीने सादर करावा, अशी या आंदोलनाची प्रमुख मागणी आहे. यासोबतच चुकीचा प्रस्ताव सादर करणाऱ्या संबंधित अधिकाऱ्यांवर शिस्तभंगाची कारवाई करावी, अशीही भूमिका बिरादार यांनी घेतली आहे.

याशिवाय, शहर व तालुक्यात अधिकृत शासकीय आधार केंद्रे सुरू करण्याची मागणी करण्यात आली आहे. सध्या कार्यरत असलेल्या सीएससी केंद्रांवरील शुल्काबाबत पारदर्शकता राखावी, तसेच बंद असलेल्या आधार केंद्रांची जबाबदारी निश्चित करून संबंधितांवर कारवाई करावी, असेही निवेदनात नमूद करण्यात आले आहे.

प्रशासनाने या गंभीर प्रश्नांकडे तातडीने लक्ष देऊन ठोस निर्णय घ्यावेत, अन्यथा आंदोलन अधिक तीव्र करण्याचा इशाराही देण्यात आला आहे. या उपोषणात नागरिकांनी मोठ्या संख्येने सहभागी व्हावे, असे आवाहन प्रिया बिरादार यांच्या वतीने करण्यात आले आहे.