राज्यस्तरीय आदर्श शिक्षक पुरस्काराने चार शिक्षकांचा गौरव

शिरूर { डेली न्यूज पोस्ट टीम -24}शिक्षण क्षेत्रातील उल्लेखनीय कार्याची दखल घेत साहित्य धारा बहुउद्देशीय सेवाभावी संस्था, भावना सोसायटी व विश्व सत्य फाउंडेशन, छत्रपती संभाजीनगर यांच्या संयुक्त विद्यमाने आयोजित राज्यस्तरीय पुरस्कार सोहळ्यात शिरूर येथील  चांदमल ताराचंद बोरा महाविद्यालयातील  चार शिक्षकांना  राज्यस्तरीय आदर्श शिक्षक पुरस्काराने  “आदर्श शिक्षक पुरस्कार” प्रदान करण्यात आला.

महाविद्यालयाच्या पीक विज्ञान विभागाचे प्रमुख प्रा. बाळासाहेब शिवाजी नान्नोर, मार्केटिंग विभागाचे प्रा. रतनकुमार ससाणे, क्रीडा शिक्षक प्रा. गणेश गव्हाणे तसेच जनरल फाउंडेशन कोर्सच्या प्रा. पूनम शेलार यांना हा मानाचा पुरस्कार प्रदान करण्यात आला. विविध क्षेत्रातील शैक्षणिक, सामाजिक व विद्यार्थीकेंद्री कार्यासाठी त्यांची निवड करण्यात आली.

छत्रपती संभाजीनगर येथे आयोजित “बुद्ध जयंती उत्सव २०२६” अंतर्गत झालेल्या राज्यस्तरीय पुरस्कार वितरण सोहळ्यात मान्यवरांच्या हस्ते सन्मानचिन्ह, सन्मानपत्र व पुष्पगुच्छ देऊन गौरव करण्यात आला.

या यशामुळे महाविद्यालयाच्या शिरपेचात आणखी एक मानाचा तुरा खोवला गेला असून शिक्षकवर्ग, विद्यार्थी आणि पालकांकडून पुरस्कारप्राप्त प्राध्यापकांवर अभिनंदनाचा वर्षाव होत आहे.