औक्षणाने विद्यार्थ्यांचे स्वागत नव्या शैक्षणिक वर्षाची उत्साहात सुरुवात

शिरूर { डेली न्यूज पोस्ट टीम -24}उन्हाळी सुट्टी संपल्यानंतर विद्यार्थ्यांची पावले पुन्हा एकदा शाळेकडे वळली.शहरातील विविध शाळामधून विद्यार्थ्यांचे वाजत गाजत फुले देऊन औक्षण करून ज्ञान मंदिरात स्वागत करण्यात आले.

शिरूर नगरपरिषदेच्या शाळा क्रमांक ४ व ६ मध्ये विद्यार्थ्यांना ट्रॅक्टर मधून फेरी मारण्यात आली. ट्रॅक्टरचे सारथ्य उपनगराध्यक्ष मितेश गादीया यांनी केले. तर विदयार्थ्यांचे स्वागत नगरध्यक्ष ऐश्वर्या पाचर्णे यांनी केले.

त्याच बरोबर विद्याधाम प्रशाला, रयत शाळा, ज्ञानगंगा विश्व् विद्यालय, व्हिजन स्कुल, जीवन विकास मंदिर याठिकाणी ही विद्यार्थ्यांचे स्वागत करण्यात आले.

 बाबुराव नगर येथील डेक्कन स्कूलमध्ये नव्या शैक्षणिक वर्षाची सुरुवात उत्साहपूर्ण वातावरणात करण्यात आली. विद्यार्थ्यांच्या स्वागतासाठी शाळेने विशेष तयारी केली होती. शाळेत येणाऱ्या प्रत्येक विद्यार्थ्याचे औक्षण करून स्वागत करण्यात आले.

शाळेचा परिसर विद्यार्थ्यांच्या गलबलाटाने गजबजून गेला होता. ठिकठिकाणी उभारण्यात आलेल्या सेल्फी पॉइंट्सवर विद्यार्थी व पालकांनी छायाचित्रे काढण्याचा आनंद लुटला. शाळेचे प्रवेशद्वार इंद्रधनुष्य, रंगीबेरंगी फुले आणि विविध कार्टून पात्रांनी सजविण्यात आल्याने आकर्षक वातावरण निर्माण झाले होते.

यावेळी इयत्ता पाचवीच्या वर्गशिक्षिका शीतल ढवळे यांनी विद्यार्थ्यांच्या मनात चांगल्या मूल्यांचे संस्कार रुजविण्यासाठी अभिनव उपक्रम राबविला. भिंतीवर विविध थोर व्यक्तिमत्त्वांची छायाचित्रे लावण्यात आली होती. शेवटी आरसा ठेवण्यात आला होता. आरशात स्वतःचे प्रतिबिंब पाहताना विद्यार्थ्यांनी भविष्यात आपणही थोर व्यक्तिमत्त्व बनण्याचा संकल्प केला. त्याचबरोबर उत्तम मूल्ये अंगीकारण्याचे वचनही विद्यार्थ्यांनी स्वतःला दिले.

शाळेचे प्राचार्य डॉ. समीर ओंकार आणि शिक्षक प्रतिनिधी जयश्री शिंदे यांनी विद्यार्थ्यांना नव्या शैक्षणिक वर्षासाठी शुभेच्छा देत अभ्यासासह सर्वांगीण विकासावर भर देण्याचे आवाहन केले.

विद्यार्थ्यांच्या स्वागताचे नियोजन डायना बोर्डे, अमोल वाघमारे, अक्षता दिवेकर, प्रिया नरवडे आणि रोहिणी चौधरी यांनी केले. या उपक्रमाला पालकांनीही उत्स्फूर्त प्रतिसाद दिला.