योगमय झाले शिरूर; शेकडो नागरिकांचा सहभाग, शहरभर निरोगी जीवनाचा संदेश

शिरूर { डेली न्यूज पोस्ट टीम 23आंतरराष्ट्रीय योग दिनानिमित्त शिरूर शहर आणि परिसर रविवारी अक्षरशः योगमय झाला. विविध सामाजिक, शैक्षणिक, राजकीय, धार्मिक आणि स्वयंसेवी संस्थांच्या वतीने आयोजित योग व प्राणायाम शिबिरांमध्ये विद्यार्थी, महिला, युवक, ज्येष्ठ नागरिक आणि विविध क्षेत्रांतील मान्यवरांनी उत्स्फूर्त सहभाग नोंदवत ‘योग करा, निरोगी रहा’ हा संदेश समाजापर्यंत पोहोचविला.

भारतीय जनता पक्षाच्या वतीने शिरूर नगरपरिषद मंगल कार्यालयात तीन दिवसीय योग व प्राणायाम शिबिराचे आयोजन करण्यात आले होते. योगगुरू शिवाजी कुलाळ यांनी योगासने व प्राणायामाचे प्रात्यक्षिकांसह मार्गदर्शन केले. यावेळी भाजप तालुकाध्यक्ष राहुल पाचर्णे, नगरसेवक सागर नरवडे, संतोष थेऊरकर, उमेश शेळके, अमित कर्डिले, नगरसेविका पूजा पोटावळे, सुनिता भुजबळ तसेच माजी शहराध्यक्ष केशव लोखंडे यांच्यासह अनेक कार्यकर्ते उपस्थित होते.

राहुल पाचर्णे यांनी योग हा प्रत्येकाच्या दैनंदिन जीवनाचा अविभाज्य भाग बनला पाहिजे, असे सांगितले. तर केशव लोखंडे यांनी दिवंगत माजी आमदार बाबुराव पाचर्णे यांनी योग शिबिरांना नेहमीच प्रोत्साहन दिल्याची आठवण करून दिली.

प्रीतम प्रकाश नगर येथील श्री स्वामी समर्थ मंदिरात ओन्ली वुमन्स जिम आणि श्री स्वामी समर्थ सेवा संस्था यांच्या संयुक्त विद्यमाने सामूहिक योग शिबिराचे आयोजन करण्यात आले. योगी आचार्य गोपेश ब्रह्मपुरीकर यांनी योग व प्राणायामाचे प्रशिक्षण दिले. पंचायत समितीच्या सभापती स्वाती घावटे यांच्यासह मोठ्या संख्येने महिला सहभागी झाल्या.

ओन्ली वुमन्स जिमच्या प्रमुख प्रिया बिरादार यांनी योग हा शरीर, मन आणि अध्यात्म यांचा सुंदर संगम असल्याचे सांगितले. तर आचार्य गोपेश ब्रह्मपुरीकर यांनी नकारात्मकता, आळस आणि द्वेष दूर करून नियमित योगाभ्यास करण्याचे आवाहन केले.

शिरूर नगरपरिषदेच्या वतीने सेंटर शाळेत योग दिन कार्यक्रमाचे आयोजन करण्यात आले. नगराध्यक्षा ऐश्वर्या पाचर्णे, उपनगराध्यक्ष मितेश गादिया तसेच नगरसेवक आणि नगरसेविका उपस्थित होते.

बालाजी शिक्षण प्रसारक मंडळाच्या बालाजी प्राथमिक व माध्यमिक विद्यालयात विद्यार्थी, शिक्षक व शिक्षकेतर कर्मचाऱ्यांनी विविध योगासने, सूर्यनमस्कार आणि प्राणायामाचे सादरीकरण केले. मुख्याध्यापक विनायक म्हसवडे यांनी योगामुळे शारीरिक तंदुरुस्ती, मानसिक स्वास्थ्य, एकाग्रता आणि सकारात्मक विचारसरणी विकसित होत असल्याचे सांगितले. योगशिक्षिका नीलू शर्मा यांनी मार्गदर्शन केले.

साधना इंटरनॅशनल स्कूलमध्येही आंतरराष्ट्रीय योग दिन मोठ्या उत्साहात साजरा करण्यात आला. संस्थेच्या साधना संजय शितोळे यांनी विद्यार्थ्यांना निरोगी जीवनशैलीसाठी योगाचे महत्त्व पटवून दिले. विद्यार्थ्यांनी ताडासन, वृक्षासन, भुजंगासन, वज्रासन तसेच अनुलोम-विलोम आणि ध्यानाचा सराव केला.

डेक्कन इंग्लिश स्कूल, बाबुराव नगर येथे विशेष योग दिन कार्यक्रम आयोजित करण्यात आला. प्राचार्य डॉ. समीर ओंकार यांनी योगाचे आरोग्यदायी व व्यक्तिमत्त्व विकासातील महत्त्व विशद केले.

चांदमल ताराचंद बोरा महाविद्यालयात राष्ट्रीय सेवा योजना (NSS), राष्ट्रीय छात्र सेना (NCC) आणि क्रीडा विभागाच्या संयुक्त विद्यमाने योग दिन साजरा करण्यात आला. प्राचार्य डॉ. के. सी. मोहिते यांनी योग ही भारताने जगाला दिलेली अमूल्य देणगी असल्याचे सांगत योगातून शरीर, मन, बुद्धी आणि आत्म्याचा समतोल साधला जातो, असे प्रतिपादन केले. आधुनिक जीवनशैलीमुळे वाढणारा तणाव, मधुमेह, उच्च रक्तदाब, लठ्ठपणा आणि हृदयविकार यांसारख्या समस्यांवर योग हा प्रभावी प्रतिबंधात्मक उपाय असल्याचे त्यांनी नमूद केले.

राष्ट्रीय स्वयंसेवक संघाच्या श्रीराम प्रभात शाखेच्या वतीनेही योगासन व प्राणायामाचा विशेष कार्यक्रम आयोजित करण्यात आला. स्वयंसेवकांनी सामूहिक योगाभ्यास करत निरोगी जीवनाचा संदेश दिला.

शहरातील विविध ठिकाणी आयोजित कार्यक्रमांमधून योगाचे शारीरिक, मानसिक आणि आध्यात्मिक महत्त्व अधोरेखित झाले. लहान मुलांपासून ज्येष्ठ नागरिकांपर्यंत सर्व स्तरांतील नागरिकांनी उत्स्फूर्त सहभाग नोंदवत योगाला दैनंदिन जीवनाचा भाग बनविण्याचा संकल्प केला. आंतरराष्ट्रीय योग दिनानिमित्त शिरूर शहरात आरोग्य, शिस्त आणि सकारात्मकतेचा अनोखा उत्सव अनुभवायला मिळाला.