शेतकऱ्यांनी शासकीय कृषी योजनांचा लाभ घ्यावा : कृषी अधिकारी कोमल हिरडे

शिरूर { डेली न्यूज पोस्ट टीम 24}: अखिल भारतीय ग्राहक पंचायतीच्या शिरूर तालुका शाखेच्या वतीने पंचायत समिती परिसरातील दत्त मंदिर येथे शेतकरी व ग्राहकांसाठी कृषी विषयक मार्गदर्शन कार्यक्रमाचे आयोजन करण्यात आले. या कार्यक्रमात शिरूर तालुका कृषी अधिकारी कोमल मनोहर हिरडे यांनी विविध शासकीय कृषी योजनांची सविस्तर माहिती देत शेतकऱ्यांनी उपलब्ध योजनांचा जास्तीत जास्त लाभ घ्यावा, असे आवाहन केले.

यावेळी हिरडे यांनी प्रधानमंत्री पीक विमा योजना, गोपीनाथ मुंडे शेतकरी अपघात विमा योजना, पांडुरंग फुंडकर फळबाग योजना, कृषी यांत्रिकीकरण योजना, फार्मर आयडी तसेच खते व बियाण्यांच्या उपलब्धतेबाबत, गुणवत्तेबाबत उद्भवणाऱ्या तक्रारी आणि त्यावरील उपाययोजनांची सविस्तर माहिती दिली. शेतकऱ्यांनी अधिकृत विक्रेत्यांकडूनच खते व बियाणे खरेदी करून त्याची पावती जतन करावी, असेही त्यांनी सांगितले.

उपकृषी अधिकारी प्रफुल्ल कामठे यांनीही कृषी विभागाच्या विविध उपक्रमांबाबत मार्गदर्शन करत शेतकऱ्यांनी आधुनिक तंत्रज्ञानाचा स्वीकार करून उत्पादनवाढीसाठी शासकीय योजनांचा प्रभावी वापर करावा, असे मत व्यक्त केले.

कार्यक्रमास अखिल भारतीय ग्राहक पंचायतीचे शिरूर तालुका अध्यक्ष नाना फराटे, संपत फराटे, दत्तात्रय विष्णू शिंदे, सौ. प्रतीक्षा निकाळजे, रोहिणी तुकाराम दरेकर, तुकाराम माधवराव फराटे, किरण संतोष गांधी, शिरूर शहर संघटक प्रवीण मुथा यांच्यासह तालुक्यातील ग्राहक पंचायतीचे अनेक कार्यकर्ते व शेतकरी मोठ्या संख्येने उपस्थित होते.