शिरूरमध्ये कानबाई माता उत्सव भक्तिमय वातावरणात उत्साहात साजरा; पाच हजार भाविकांची उपस्थिती

शिरूर { डेली न्यूज पोस्ट टीम 24}: खान्देशवासीयांचे आराध्य दैवत असलेल्या श्री कानबाई माता उत्सवाचा पहिला वर्षपूर्ती सोहळा शिरूर तालुक्यातील रामलिंग येथे मोठ्या उत्साहात, भक्तिभावाने आणि पारंपरिक वातावरणात साजरा करण्यात आला. रामलिंग येथील प्रभू रामलिंग मंदिरासमोरील सभामंडपात आयोजित करण्यात आलेल्या या तीन दिवसीय उत्सवाला शिरूर पंचक्रोशीतील खान्देशी बांधव-भगिनींसह नागरिकांचा उत्स्फूर्त प्रतिसाद मिळाला.

उत्सवाच्या पहिल्या दिवशी सायंकाळी सप्तपूजनाचा धार्मिक विधी पार पडला. त्यानंतर उत्सवाच्या मुख्य दिवशी शिवरक्षा कॉलनी येथून श्री कानबाई मातेची भव्य आरती व मिरवणूक काढण्यात आली. ढोल-ताशांचा गजर, पारंपरिक वाद्यांचा निनाद आणि भक्तिमय जयघोषात ही मिरवणूक रामलिंग येथील सभामंडपात पोहोचली. तेथे विधिवत पूजा-अर्चा करून देवीची स्थापना करण्यात आली.

यानंतर सायंकाळी महापूजा आणि महाप्रसादाचे आयोजन करण्यात आले. उत्सवात धार्मिक कार्यक्रमांसोबतच खान्देशी संस्कृती आणि परंपरेचे दर्शन घडविणाऱ्या सांस्कृतिक कार्यक्रमांचे आयोजन करण्यात आले होते. नाशिक येथील प्रसिद्ध दोस्ती बँड, शेंदुर्णी तसेच खान्देशी ढोलकी बँडच्या कार्यक्रमाने उत्सवात रंगत आणली. पारंपरिक संगीत आणि ढोलकीच्या तालावर उपस्थित भाविकांनी उत्स्फूर्त प्रतिसाद दिला.

उत्सवाला शिरूर पंचक्रोशीतील खान्देशी बांधव-भगिनी, मान्यवर, लोकप्रतिनिधी, व्यावसायिक तसेच ग्रामस्थ मोठ्या संख्येने उपस्थित होते. परिसरात दिवसभर भक्तिमय वातावरण निर्माण झाले होते. सुमारे पाच हजार भाविकांनी श्री कानबाई मातेचे दर्शन घेत महाप्रसादाचा लाभ घेतला.

उत्सवाच्या अंतिम दिवशी सकाळी विधिवत पूजा-अर्चा करण्यात आली. त्यानंतर रामलिंग गावातून श्री कानबाई मातेची भव्य मिरवणूक काढण्यात आली. या मिरवणुकीत शिक्रापूर, कारेगाव, रांजणगाव तसेच शिरूर शहरातील समस्त खान्देशी समाजबांधव मोठ्या संख्येने सहभागी झाले. पारंपरिक वेशभूषा, वाद्यांचा गजर आणि ‘कानबाई मातेचा जयघोष’ यामुळे संपूर्ण परिसर भक्तिमय झाला होता. मिरवणुकीनंतर विधिवत विसर्जन सोहळ्याने उत्सवाची सांगता झाली.

खान्देशी समाजाच्या धार्मिक श्रद्धा, परंपरा आणि सांस्कृतिक वारसा जपण्याबरोबरच समाजबांधवांना एकत्र आणण्याचे काम या उत्सवाच्या माध्यमातून झाले. पहिल्याच वर्षी उत्सवाला मिळालेला मोठा प्रतिसाद पाहता आगामी काळात हा उत्सव अधिक व्यापक स्वरूपात साजरा होण्याची अपेक्षा व्यक्त करण्यात आली.

या उत्सवाचे आयोजन कानबाई माता उत्सव समिती, शिरूर यांच्या वतीने करण्यात आले होते. समस्त खान्देश परिवार, शिरूर यांच्या सहकार्याने आणि निमंत्रणाने हा उत्सव उत्साहात पार पडला.