भक्तीमय वातावरणात शिरूरकरांचा बाप्पाला निरोप ढोल-ताशांचा गजर, आकर्षक रथ-पालख्या आणि पर्यावरण जनजागृतीने विसर्जन मिरवणुकीला रंगत

शिरूर { डेली न्यूज पोस्ट टीम 24): सुखकर्ता आणि आनंद-मांगल्याचे प्रतीक असलेल्या श्री गणरायाला शिरूरकरांनी भक्तीमय वातावरणात भावपूर्ण निरोप दिला. शहरातील प्रमुख गणेश मंडळांच्या विसर्जन मिरवणुका दुपारपासून सुरू झाल्या.

ढोल-ताशांचा गजर, टाळ-मृदंगाचा निनाद, भजन, आकर्षक रथ-पालख्या आणि विविध देखाव्यांमुळे शहरातील वातावरण गणेशमय झाले होते.

शहरातील मानाचा पहिला गणपती असलेल्या समस्त नामदेव समाज, श्रीराम मंदिर, राम आळी येथील गणरायाची माजी नगराध्यक्ष राजेंद्र क्षीरसागर, विश्वस्त विवेक बगाडे, महेश बोत्रे, मंगेश क्षीरसागर यांच्या उपस्थितीत पूजा व आरती करण्यात आली. त्यानंतर गणेश विसर्जन मिरवणुकीस प्रारंभ झाला.
शिवसेवा मंदिर येथील मानाच्या गणरायाची आरती विश्वस्त तथा शिरूर शहर विकास आघाडीचे अध्यक्ष अॅड. सुभाष पवार, विश्वस्त बाळासाहेब परदेशी, नाना खांडरे व मनसुख गुगळे यांच्या हस्ते करण्यात आली. त्यानंतर शिवसेवा मंडळ ट्रस्टची विसर्जन मिरवणूक मार्गस्थ झाली. या गणरायाचे लाटे आळीतील शनि मंदिराजवळील गणेश विसर्जन घाटावर सायंकाळी चारपूर्वी विसर्जन करण्यात आले.
हनुमान मंदिर गणेश मित्र मंडळ, महाराणा प्रताप गणेश मित्र मंडळ यांच्या गणेशमूर्ती पालखीत विराजमान होत्या. कापड बाजार मित्र मंडळाने आकर्षक सजावट केली होती. सरदार पेठ गणेश मित्र मंडळाची मूर्तीही पालखीत विराजमान होती. टाळ-मृदंग आणि भजनाच्या गजरात निघालेल्या या मिरवणुकांमध्ये पर्यावरण संवर्धन व जनजागृतीचे संदेश देणारे फलकही कार्यकर्त्यांनी हातात घेतले होते.
युवा संघर्ष गणेश मित्र मंडळाचा गणराय आकर्षक पुष्परथात, तर सूरजनगर गणेश मित्र मंडळाचा गणराय आकर्षक रथात विराजमान झाला होता. या मंडळांच्या गणरायांचे सायंकाळी विसर्जन करण्यात आले. त्रिमूर्ती गणेश मित्र मंडळ, रेव्हन्यू कॉलनीची मिरवणूक पारंपरिक ढोल-ताशांच्या गजरात निघाली.
विसर्जनाच्या आदल्या दिवशीही शहरातील अनेक मंडळांनी गणरायाला भावपूर्ण निरोप दिला. यामध्ये वरदविनायक सैनिक व शिवाजी सोसायटी, जय गणेश तरुण मित्र मंडळ, सतीशभाऊ घोलप मित्र मंडळ सिद्धार्थनगर, एकलव्य गणेश मित्र मंडळ पाण्याची टाकी-भिल्लवस्ती, वक्रतुंड गणेश मित्र मंडळ आदिनाथनगर, श्री साई गणेश मित्र मंडळ हुडको कॉलनी, नवयुग गणेश मित्र मंडळ पाण्याच्या टाकीजवळ, सुंदर सृष्टी गणेश मित्र मंडळ आणि मौर्य पुरम गणेश मित्र मंडळ यांचा समावेश होता.
रामलिंग रोडवरही विसर्जन मिरवणुकीत मोठा उत्साह आणि जल्लोष पाहायला मिळाला. विविध मंडळांनी सादर केलेले आकर्षक देखावे नागरिकांचे लक्ष वेधून घेत होते. नाशिक, धुळे, जळगाव आदी जिल्ह्यांतून आलेल्या वाद्यवृंदांनी मिरवणुकीत रंगत वाढवली. यंदा विसर्जन मिरवणुकीत महिलांचा लक्षणीय सहभाग दिसून आला.
नगरपरिषदेची पर्यावरणपूरक तयारी
गणेश विसर्जनासाठी शिरूर नगरपरिषदेने विशेष तयारी केली होती. नगराध्यक्षा ऐश्वर्या अभिजीत पाचर्णे, उपनगराध्यक्ष मितेश प्रदीप गादिया, विविध विषय समित्यांचे सभापती, नगरसेवक आणि मुख्याधिकारी प्रितम पाटील यांनी विसर्जन मार्गाची पाहणी करून रस्ते, पथदिवे, झाडांच्या फांद्या, घाट व स्वच्छतेबाबत आवश्यक सूचना दिल्या. त्यानुसार रस्त्यांवरील खड्डे बुजविणे, स्वच्छता आणि प्रकाशव्यवस्थेसह आवश्यक कामे पूर्ण करण्यात आली.
नगरपरिषद व पोलीस प्रशासनाने संयुक्त पाहणी करून मिरवणूक मार्गातील अडथळे दूर केले. हलवाई चौकात गणेश मंडळांच्या स्वागतासाठी स्टेज उभारण्यात आले होते. पोलिसांसाठी विसर्जनस्थळी स्वतंत्र व्यवस्था, शहरातील महत्त्वाच्या ठिकाणी सीसीटीव्ही कॅमेरे, अखंडित वीजपुरवठ्यासाठी महावितरणशी समन्वय तसेच विसर्जन घाटावर जनरेटरची व्यवस्था करण्यात आली.
पर्यावरणपूरक गणेशोत्सवासाठी शनि मंदिर विसर्जन घाट, दशक्रिया विधी घाट आणि रयत शाळेचे मैदान येथे कृत्रिम विसर्जन हौद व कुंभ तयार करण्यात आले होते. निर्माल्य संकलनासाठी विशेष कलशांची व्यवस्था करण्यात आली. नगरपरिषद व टोफू ॲपच्या माध्यमातून नागरिकांना गणेशमूर्ती विसर्जनासाठी मोफत विसर्जन वाहनाची सुविधाही उपलब्ध करून देण्यात आली.
विसर्जनावेळी सुव्यवस्था राखण्यासाठी नगरपरिषदेचे अधिकारी व कर्मचारी नियुक्त करण्यात आले होते. तसेच मूर्ती संकलन उपक्रमात सहभागी होणाऱ्या भक्तांना ‘पर्यावरण दूत’ प्रमाणपत्र देण्यात येणार आहे.
नदीपात्रातील पाण्याची पातळी वाढलेली असल्याने नागरिकांनी विसर्जनावेळी विशेष खबरदारी घ्यावी, निर्माल्य नदीपात्रात न टाकता निर्माल्य कलशातच टाकावे आणि कृत्रिम हौद अथवा मूर्ती संकलन उपक्रमाचा वापर करावा, असे आवाहन शिरूर नगरपरिषदेने केले आहे. नदीपात्र व नैसर्गिक जलस्रोत प्रदूषित होऊ नयेत, यासाठी नागरिकांनी प्रशासनाला सहकार्य करण्याचे आवाहनही करण्यात आले.