आईचेच सोन्याचे दागिने चोरणारा मुलगा जेरबंद; ४८ तासांत गुन्ह्याची उकल

शिरूर,{ डेली न्यूज पोस्ट टीम 24}चांडोह (ता. शिरूर) येथे घरफोडी करून स्वतःच्या आईचे सोन्याचे दागिने चोरी करणाऱ्या मुलाला शिरूर पोलिसांनी अवघ्या ४८ तासांत जेरबंद केले. आरोपीकडून सुमारे ५ लाख ५ हजार रुपयांचे नऊ तोळे सोन्याचे दागिने हस्तगत करण्यात आले आहेत.

पोलिसांनी दिलेल्या माहितीनुसार, २८ एप्रिल रोजी चांडोह येथील दत्तात्रय बबन जाधव यांच्या बंद घरातील किचनमध्ये स्टीलच्या डब्यात ठेवलेले नऊ तोळे सोन्याचे दागिने चोरीस गेले होते. याप्रकरणी शिरूर पोलीस ठाण्यात भारतीय न्याय संहिता कलम ३०५ (अ) अन्वये गुन्हा दाखल करण्यात आला होता.

घटनेचे गांभीर्य लक्षात घेऊन पोलीस निरीक्षक संदेश केंजळे यांनी तपास पथकाला तातडीने चोरट्याचा शोध घेण्याच्या सूचना दिल्या होत्या. तपासादरम्यान तांत्रिक विश्लेषण व गोपनीय माहितीच्या आधारे रविंद्र दत्तात्रय जाधव (वय ३३, रा. चांडोह, ता. शिरूर) याच्यावर संशय निर्माण झाला.

पोलिसांनी त्याला ताब्यात घेऊन चौकशी केली असता त्याने गुन्ह्याची कबुली दिली. त्यानंतर आरोपीकडून चोरीस गेलेले सुमारे ५ लाख ५ हजार रुपयांचे नऊ तोळे सोन्याचे दागिने जप्त करण्यात आले.

या प्रकरणाचा पुढील तपास पोलीस उपनिरीक्षक गोविंद खटींग करीत आहेत. पोलीस अधीक्षक संदीप सिंह गिल, अपर पोलीस अधीक्षक रमेश चोपडे, उपविभागीय पोलीस अधिकारी प्रशांत ढोले आणि पोलीस निरीक्षक संदेश केंजळे यांच्या मार्गदर्शनाखाली ही कारवाई करण्यात आली.