शिरुर ( डेली न्यूज पोस्ट टीम -२४)—गेल्या अनेक वर्षापासूनचे शिरुर करांचे रेल्वेचे स्वप्न पूर्ण होण्याचा दृष्टीने पाउले पडू लागले असून पुणे-अहिल्यानगर शिरुर मार्गे रेल्वेमार्गाचा प्रकल्प अहवाल सादर करण्यात आला आहे .
पुणे-अहिल्यानगर या अनेक वर्षांपासून मागणीत व प्रलंबित असलेल्या नवीन रेल्वेमार्गाचा डीपीआर अखेर रेल्वेच्या बांधकाम विभागाकडून रेल्वे बोर्डाकडे सादर करण्यात आला आहे. या प्रस्तावानुसार हा रेल्वेमार्ग पुणे-अहिल्यानगर महामार्गाला समांतर जाणार असून, मार्ग पूर्ण झाल्यानंतर नगर ते पुणे रेल्वे अंतरात तब्बल ३८ किलोमीटरने घट होणार आहे.
सध्याचे दौंड मार्गे नगरचे रेल्वे अंतर सुमारे १५४ किमी आहे. त्यामुळे थेट रेल्वेमार्गाची गरज गेल्या अनेक वर्षांपासून नागरिकांकडून सातत्याने व्यक्त केली जात होती. अखेर या मागणीची दखल घेत रेल्वे विभागाने सर्वेक्षण करून प्रकल्प अहवाल तयार केला आहे.
या मार्गासाठी ११ हजार कोटी रुपयांचा खर्च अपेक्षित असून, विद्युतीकरणासह दुहेरी मार्गाची तरतूद देखील करण्यात आली आहे.
पुणे ते नगर दरम्यान एकूण ११ स्थानके प्रस्तावित आहेत.पुणे,वाघोली
,शिक्रापूर,रांजणगाव,कारेगाव,शिरूर,सुपा,चास,केडगाव, नगर अशी आहेत .
हा मार्ग पूर्णत्वास गेल्यास पुणे अहिल्यानगर प्रवास अधिक वेगवान, सुरक्षित आणि सोयीस्कर होणार आहे. तसेच या प्रकल्पामुळे या मार्गावरील शहरी व ग्रामीण भागांचा सर्वांगीण विकास होण्यास मदत होणार आहे .