शिक्षकांची नेमणूक करावी या मागणी साठी गटशिक्षण अधिकारी दालनाच्या बाहेर भरला विद्यार्थ्यांचा वर्ग

शिरूर { डेली न्यूज पोस्ट टीम 24}
दरेकरवाडी येथील जिल्हा परिषदेच्या शाळेतील २ पदवीधर शिक्षकांची तातडीने नेमणूक करावी अशी मागणी करत शाळेच्या विद्यार्थ्यांनी शिरूर येथील गटविकास अधिकारी यांच्या दालना समोर वर्ग भरवित आंदोलन केले.प्रशासनाच्या आश्वासन नंतर आंदोलन मागे घेण्यात आले.
याबाबतची माहिती देताना शालेय व्यवस्थापन समितीच्या सदस्यांनी व अशोक भोसले यांनी सांगितले की दरेकरवाडी येथे जिल्हा परिषदेच्या प्राथमिक शाळेत इयत्ता पहिली ते इयत्ता सातवी पर्यतचे वर्ग आहेत. या ठिकाणी एकूण मंजूर शिक्षकांची संख्या ५ असताना सध्या फक्त तीनच शिक्षक शाळेत कार्यरत असून दोन शिक्षकांची पदे रिक्त आहे. इयत्ता पहिली ते इयत्ता सातवी या वर्गांकरिता हे तीन शिक्षक शिकवतात.शाळेत पदवीधर शिक्षकांच्या दोन जागा मंजूर असूनही त्या रिक्त आहेत. शिक्षक नसल्यामुळे विद्यार्थ्यांचे शैक्षणिक नुकसान होत आहे. याबाबत दोन वर्ष पाठपुरावा करण्यात येत आहे. या संदर्भात प्रशासकीय पातळीवर ही मागणी करण्यात आली परंतु शिक्षक उपलब्ध करून देण्यात आले नाहीत.
शाळेला दोन शिक्षक तातडीने नेमावे याकरिता आज विद्यार्थ्यांनी गट विकास अधिकाऱ्यांच्या दालना बाहेर वर्ग भरविला.
दरम्यान या संदर्भात शिक्षण खात्यातील वरिष्ठ अधिकारी संजय नायकोडी यांच्या समवेत शालेय व्यवस्थापन समितीच्या सदस्यांनी चर्चा केली असता शाळेतील रिक्त असणाऱ्या दोन शिक्षकांपैकी एक शिक्षक तातडीने देण्याचे व व उर्वरित एक शिक्षक आगामी काही काळात उपलब्ध करून देण्याचे आश्वासन त्यांनी दिल्याचे अशोक भोसले यांनी सांगितले.
दरम्यान ग्रामस्थांनी व शालेय व्यवस्थापन समितीच्या सदस्यांनी तहसीलदार यांचीही भेट घेत शिक्षकांची तातडीने नेमणूक करावी अशी मागणी केली. बाजार समितीचे माजी सभापती शशिकांत दसगुडे यांनाही याबाबत निवेदन देण्यात आले.
यावेळी शालेय व्यवस्थापन समितीचे अध्यक्ष प्रभाकर दरेकर अश्विनी कड अशोक भोसले सुरेखा दरेकर मीनाक्षी दरेकर स्नेहल दरेकर संगीता चकोर शंकर दरेकर दिनकर दरेकर व संदीप दरेकर उपस्थित होते.
तालुका गटशिक्षणाधिकारी बालकृष्ण कळमकर यांनी याबाबत माहिती देताना सांगितले की दरेकरवाडी येथील जिल्हा परिषदेच्या शाळे करिता पाच शिक्षक पदे मंजूर आहेत त्यातील दोन पदे पदवीधर शिक्षकांची.आहेत. शिक्षक बदली प्रक्रिया दरम्यान दरेकरवाडी येथील शाळेत कुणी आले नाही. दरम्यान उद्यापासून या शाळेत एक शिक्षक उपलब्ध करून देण्यात आला आहे.तालुक्यात ८३ उपशिक्षकांच्या जागा रिक्त असल्याचे ही त्यांनी सांगितले.