आंतरराष्टीय लेखन स्पर्धेत वैभव जैन यांना १० हजार डॉलर्सचे ग्रँड प्राइज

शिरूर { डेली न्यूज पोस्ट टीम 24}: कृत्रिम बुद्धिमत्ता (एआय) झपाट्याने विकसित होत असताना, तिच्या मानवी आयुष्यावरील परिणामांबाबत सखोल आणि जबाबदार विचार मांडणारे चार्टर्ड अकाउंटंट वैभव जैन यांनी फ्यूचर ऑफ लाइफ इन्स्टिट्यूट आयोजित ‘कीप द फ्युचर ह्युमन क्रिएटिव्ह कंटेंट’ या आंतरराष्ट्रीय सर्जनशील लेखन स्पर्धेत १०,००० डॉलर्स (सुमारे ८.३ लाख रुपये) चे ग्रँड प्राइज पटकावले आहे.

या स्पर्धेसाठी जगभरातून ३०० पेक्षा अधिक प्रवेशिका प्राप्त झाल्या होत्या. त्यामधून वैभव जैन यांची निवड करण्यात आली असून, स्पर्धेअंतर्गत एकूण १,००,००० डॉलर्सपेक्षा अधिक रकमेची पारितोषिके जाहीर करण्यात आली आहेत. विशेष बाब म्हणजे, एआय विषयावर आधारित या जागतिक स्पर्धेत वैभव जैन हे एकमेव भारतीय विजेते ठरले आहेत.

तंत्रज्ञान, एआय सुरक्षा तसेच डेटा गोपनीयता या विषयांचा वैभव जैन दीर्घकाळ अभ्यास करत आहेत. एआयच्या झपाट्याने होणाऱ्या प्रगतीच्या तुलनेत त्याच्या सुरक्षित वापराबाबत पुरेशी आणि सखोल चर्चा होत नसल्याची चिंता त्यांच्या लेखनातून व्यक्त होते. ‘द बटन डझन्ट एक्झिस्ट’ या त्यांच्या विजयी निबंधात एआयवर नियंत्रण मिळवण्यासाठी एखादे साधे ‘बटण’ असल्याचा समज त्यांनी ठामपणे फेटाळून लावला आहे. एआयवर प्रभावी नियंत्रणासाठी केवळ तांत्रिक उपाय पुरेसे नसून, मानवकेंद्री मूल्ये, नैतिकता आणि सामाजिक जबाबदारी तितक्याच महत्त्वाच्या असल्याचा ठाम संदेश त्यांनी दिला आहे.

या यशामुळे जागतिक पातळीवर भारतीय विचारविश्वाची दखल घेतली जाईल, तसेच एआयविषयक चर्चेला नवी दिशा मिळेल, असा विश्वास तज्ज्ञांनी व्यक्त केला आहे.

जैन यांच्या यशाबद्दल लक्ष्मीकांत  मोहनलाल खाबिया, वर्धमान मोहनलाल खाबिया, नीलेश मोहनलाल खाबिया आदीनी अभिनंदन केले आहे. जैन हे वर्धमान खाबिया यांचे जावई आहेत.