फायनान्स हप्त्याच्या वादातून तरुणावर जीवघेणा हल्ला

शिरूर { डेली न्यूज पोस्ट टीम 24}: मोटारसायकलच्या फायनान्सचे हप्ते न भरल्याच्या कारणावरून झालेल्या वादातून एका तरुणावर चौघांनी मिळून जीवघेणा हल्ला केल्याची घटना शिरूर शहरात घडली. या प्रकरणी शिरूर पोलीस ठाण्यात गुन्हा दाखल करण्यात आला आहे.

याबाबत पोलिसांनी दिलेल्या माहितीनुसार, फिर्यादी किरण सावळा फुलारे (वय २३, व्यवसाय नोकरी, रा. आंधळगाव, ता. शिरूर) हे २८ डिसेंबर २०२५ रोजी दुपारी दीडच्या सुमारास शिरूर गाव हद्दीत रिलायन्स पेट्रोल पंपाशेजारी असलेल्या सुनिल वडेवाले जवळ उभे असताना जाधव व त्याच्यासोबत असलेल्या तीन अनोळखी इसमांनी त्यांना अडवले. मोटारसायकलच्या फायनान्सचे हप्ते थकीत असल्याच्या कारणावरून आरोपींनी शिवीगाळ व दमदाटी करत किरण फुलारे यांना मारहाण केली.

या दरम्यान जाधव याने काचेची बाटली त्यांच्या डोक्यात फोडून गंभीर दुखापत केली, तर एका अनोळखी इसमाने हातातील दगडाने त्यांच्या उजव्या खांद्यावर प्रहार केल्याचे फिर्यादीत नमूद आहे. या मारहाणीत किरण फुलारे जखमी झाले.

या प्रकरणी शिरूर पोलीस ठाण्यात गुन्हा रजिस्टर क्रमांक ९११/२०२५ अन्वये भारतीय न्याय संहितेच्या कलम ११८(१), ११५(२), ३५१(२)(३), ३५२ व ३(५) अंतर्गत गुन्हा दाखल करण्यात आला आहे.

या प्रकरणाचा तपास पोलीस निरीक्षक संदेश केंजळे यांच्या मार्गदर्शनाखाली पोलीस हवालदार भगत (बॅज क्र. ९८) करीत असून फरार आरोपींचा शोध सुरू आहे.