पुणे–अहिल्यानगर महामार्गावरील सुरक्षित प्रवासासाठी सामुदायिक प्रयत्न आवश्यक

शिरूर { डेली न्यूज पोस्ट टीम 24}सुरक्षित व अपघातविरहित प्रवास हा प्रत्येक नागरिकाचा मूलभूत अधिकार असून, पुणे–अहिल्यानगर महामार्गावरील प्रवास सुरक्षित करण्यासाठी सामुदायिक प्रयत्नांची आवश्यकता आहे, असे प्रतिपादन कृषिलोक विकास संस्थेचे अध्यक्ष व माजी नगरसेवक रवींद्र धनक यांनी केले.

शिरूरमध्ये नुकतीच सुरक्षित नागरी वाहतूक समिती गठित करण्यात आली असून, समितीची बैठक पार पडली. या बैठकीस माजी नगरसेवक रवींद्र धनक, नगरसेविका स्वप्ननाली जामदार, नगरसेविका डॉ. सुनीता पोटे, माजी नगरसेविका माया गायकवाड, ज्ञानदेव चव्हाण, वैशाली चव्हाण, खुशाल गाडे, महावीर कोठारी, डॉ. वैशाली साखरे, पुष्पक केवडकर, सविता बोरुडे, प्रीती बनसोडे, परविन शेख, मयूर सुपुते, अविनाश दुर्गे आदी उपस्थित होते.

धनक यांनी सांगितले की, पुणे–अहिल्यानगर महामार्गावर शिरूर व परिसरात गेल्या काही महिन्यांत अपघातांची संख्या चिंताजनकरीत्या वाढली आहे. अनेक अपघातांत निष्पाप नागरिकांना आपले प्राण गमवावे लागत असून, नागरिकांच्या सुरक्षिततेचा गंभीर प्रश्न निर्माण झाला आहे. पुणे ते शिरूर दरम्यानचा प्रवास सुरक्षित व अपघातविरहित करण्यासाठी तातडीने समन्वयित व ठोस उपाययोजना राबविणे आवश्यक असून, यासाठी प्रशासनावर लोकांचा दबाव निर्माण करणे गरजेचे असल्याचे त्यांनी नमूद केले.

यावेळी वैशाली चव्हाण यांनी पुणे–अहिल्यानगर महामार्गावर शिरूर ते पुणे दरम्यान मागील काही वर्षांत झालेल्या अपघातांची संख्या, त्यातील मृत्यू आणि वारंवार अपघात होणाऱ्या ठिकाणी प्रशासनाने केलेल्या उपाययोजनांची माहिती सार्वजनिक होणे आवश्यक असल्याचे मत व्यक्त केले.

नगरसेविका डॉ. सुनीता पोटे म्हणाल्या की, लवकरच पुणे–अहिल्यानगर महामार्गाचे काम सुरू होणार असून, कामकाजाच्या काळात अपघात होऊ नयेत यासाठी प्रशासनाने विशेष दक्षता घ्यावी.

बैठकीत पुणे–अहिल्यानगर महामार्गावरील वाहतूक व रहदारीच्या प्रश्नांबाबत पुणे जिल्हाधिकारी व पालकमंत्री यांना निवेदन देण्याचा निर्णय घेण्यात आला.

डॉ. वैशाली साखरे यांनी सांगितले की, समितीची पुढील बैठक १३ जानेवारी रोजी होणार असून, या प्रश्नावर अधिकाधिक लोकसहभाग वाढविण्यासाठी प्रयत्न केले जातील. तसेच महिलांनी मोठ्या संख्येने पुढे येऊन या समस्येच्या निराकरणासाठी सहभाग घ्यावा, असे आवाहन त्यांनी केले.बैठकीदरम्यान नवनिर्वाचित नगरसेवक डॉ. सुनीता पोटे व नगरसेविका स्वप्ननाली जामदार यांचा सत्कार करण्यात आला.