पोलिसांनी व दहशतवाद विरोधी शाखेने संयुक्त कारवाई करत एका लॉजिंगमध्ये सुरू असलेल्या कथित वेश्याव्यवसायाचा पर्दाफाश केला. या कारवाईत सात महिलांची सुटका

शिरूर { डेली न्यूज पोस्ट टीम 24}एमआयडीसी पोलिसांनी व दहशतवाद विरोधी शाखेने संयुक्त कारवाई करत रांजणगाव परिसरातील एका लॉजिंगमध्ये सुरू असलेल्या कथित वेश्याव्यवसायाचा पर्दाफाश केला. या कारवाईत सात महिलांची सुटका करण्यात आली असून दोन जणांविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, २ जून रोजी दुपारी सुमारे ४ वाजण्याच्या सुमारास नगर-पुणे महामार्गावरील जयभवानी फर्निचरजवळील एका लॉजिंगमध्ये वेश्याव्यवसाय सुरू असल्याची माहिती मिळाली होती. त्यानुसार एमआयडीसी पोलीस व दहशतवाद विरोधी शाखेच्या पथकाने छापा टाकला.

या प्रकरणी लॉजिंग चालक लुतपफर मुज्जमहलक वय -४५ सध्या रा. रांजणगाव मूळ रा. नालीताजल , ता. बाजीतपूर धनियाखाली , जि. हुगली पश्चिम बंगाल, व बबलू साहू रा. कारेगाव मूळ राहणार – उडीसा यांच्याविरुद्ध अनैतिक मानवी वाहतूक प्रतिबंधक कायद्यान्वये गुन्हा दाखल करण्यात आला आहे. आरोपी महिलांच्या असहाय्यतेचा गैरफायदा घेऊन त्यांच्याकडून देहव्यापार करून घेत असल्याचे तपासात निष्पन्न झाल्याचे पोलिसांनी सांगितले.

कारवाईदरम्यान पोलिसांनी सात महिलांची सुटका केली. सुटका करण्यात आलेल्या महिलांपैकी तीन महिला बांगलादेशी असल्याचे प्राथमिक चौकशीत समोर आले आहे. संबंधित महिलांना महिला सुधारगृह, मुंढवा (पुणे) येथे सुरक्षित ठेवण्यात आले असून त्यांच्या नागरिकत्वाबाबतची पडताळणी प्रक्रिया सुरू आहे.

ही कारवाई पोलीस अधीक्षक पुणे ग्रामीण यांच्या मार्गदर्शनाखाली अपर पोलीस अधीक्षक, दहशतवाद विरोधी शाखा व रांजणगाव एमआयडीसी पोलीस स्टेशनच्या संयुक्त पथकाने केली. पुढील तपास एमआयडीसी पोलीस करीत आहेत.