सेनादिना निमित्ताने बी. जी. पाचर्णे यांना व्हेटरन अचिव्हर्स अवॉर्ड’

शिरूर {डेली न्यूज पोस्ट टीम 24}१५ जानेवारी रोजी साजऱ्या झालेल्या सेनादिनानिमित्त दक्षिण कमांडच्या कमांड हेडक्वार्टर येथे आयोजित कार्यक्रमात माजी सैनिकांचा सन्मान करण्यात आला. यावेळी वेटरन व तर्डोबाचीवाडी ता. शिरूर चे माजी सरपंच बी. जी. पाचर्णे यांना लेफ्टनंट जनरल धीरज सेठ यांच्या हस्ते व्हेटरन अचिव्हर्स अवॉर्ड’ प्रदान करण्यातआले .

बी. जी. पाचर्णे यांनी माजी सैनिक व सैनिक परिवारांच्या कल्याणासाठी गेल्या चार दशकांत केलेल्या उल्लेखनीय कार्याबद्दल ‘व्हेटरन अचिव्हर्स अवॉर्ड’ प्रदान करण्यात आले. दक्षिण कमांडचे आर्मी कमांडरलेफ्टनंट जनरल धीरज सेठ यांच्या हस्ते ते देण्यात आले

भारतीय सैन्यात सुमारे वीस वर्षे सेवा केल्यानंतर निवृत्त झालेल्या पाचर्णे यांनी माजी सैनिक, वीरपत्नी, वीरमाता, वीरपिता तसेच स्वातंत्र्यसैनिक व त्यांच्या कुटुंबाचा पुनर्वसनासाठी भरीव कार्य केले आहे. पहिल्या व दुसऱ्या महायुद्धातील अनेक सैनिक शिक्षणाअभावी पेन्शनपासून वंचित राहिले होते. अशा सैनिकांची कागदपत्रे गोळा करून, गावोगावी जाऊन पत्ते शोधून त्यांना पेन्शन मिळवून देण्यासाठी पाचर्णे यांनी विशेष पुढाकार घेतला.याच कार्यातून तत्कालीन सैनिक कल्याण मंत्री दादा जाधवराव यांच्या सहकार्याने तसेच संरक्षण मंत्री शरद पवार यांच्या आदेशानुसार अनेक सैनिकांच्या पेन्शन प्रक्रिया सुरू झाल्या. शिरूर तालुक्यातील सुमारे ७० सैनिकांना स्वतःच्या खर्चाने संबंधित कार्यालयात नेऊन पेन्शन सुरू करून देण्यात त्यांचे मोलाचे योगदान राहिले. त्यापैकी आजही १७ ज्येष्ठ सैनिक या योजनेचा लाभ घेत असून सध्या त्यांना दरमहा दहा हजार रुपयांची पेन्शन मिळत आहे.

 पाचर्णे यांच्या सामाजिक कार्याची दखल घेऊन ग्रामस्थांनी पाचर्णे यांची बिनविरोध सरपंचपदी निवड केली होती. सरपंच म्हणून त्यांनी ग्रामस्वच्छता, सामाजिक एकात्मता, युवक व महिलांचा सहभाग ग्राम विकासात सहभाग यावर भर देत त्यांनी काम केले.