शिरूरच्या उपनगराध्यक्षपदी मितेश प्रदीप गादिया

शिरूर{ डेली न्यूज पोस्ट टीम 24}:नगरपरिषद निवडणुकीदरम्यान परस्परांविरोधात दंड थोपटलेले राष्ट्रवादी काँग्रेस शरद पवार पक्ष आणि राष्ट्रवादी काँग्रेस अजित पवार पक्ष अखेर उपनगराध्यक्षपदाच्या निवडणुकीसाठी एकत्र आले.उपनगराध्यक्ष पदाच्या निवडणुकी साठी राष्ट्रवादी काँग्रेस ( शरद पवार ) व भाजपचे नितीन पाचर्णे या दोघात लढत झाली. गादिया यांना १४ मते मिळाली तर पाचर्णे यांना ११ मते मिळाली व गादिया विजयी झाले.

या नवीन राजकीय जुळवाजुळवीतून उपनगराध्यक्षपदी राष्ट्रवादी काँग्रेस शरद पवार पक्षाचे मितेश प्रदीप गादिया यांची निवड करण्यात आली.

शिरूर नगरपरिषदेच्या रसिकलाल धारीवाल सभागृहात उपनगराध्यक्ष व स्वीकृत नगरसेवक निवडीसाठी विशेष सभा घेण्यात आली. नगराध्यक्ष ऐश्वर्या पाचर्णे यांच्या अध्यक्षतेखाली झालेल्या या पहिल्याच बैठकीत सत्तासमीकरणे स्पष्ट झाली. राज्य व केंद्रात सत्तेत असलेले भाजप व राष्ट्रवादी काँग्रेस (अजित पवार गट) स्थानिक पातळीवर एकत्र येतील, अशी चर्चा होती आणि भाजपचा उपनगराध्यक्ष होईल, अशीही अटकळ बांधली जात होती. मात्र, दोन्ही राष्ट्रवादी काँग्रेस गट एकत्र आल्याने ही समीकरणे बदलली.

नगरपरिषदेच्या निवडणुकीत सर्वाधिक ११ नगरसेवक निवडून आणणाऱ्या भाजपला विरोधी बाकावर बसावे लागले. राष्ट्रवादी काँग्रेस (अजित पवार गट)चे सात नगरसेवक असून एका अपक्ष नगरसेविकेच्या पाठिंब्यामुळे त्यांचे संख्याबळ आठ झाले आहे. दुसरीकडे, शरद पवार गटासह दोन्ही राष्ट्रवादी एकत्र आल्याने नगरपरिषदेत सत्तास्थापना झाली. त्यामुळे केंद्र व राज्यात एकत्र असलेले भाजप–राष्ट्रवादी पक्ष शिरूरमध्ये मात्र एकमेकांच्या विरोधात उभे राहिल्याचे चित्र निर्माण झाले आहे.

उपनगराध्यक्षपदी निवड झालेले मितेश गादिया हे प्रभाग क्रमांक आठमधून निवडून आले आहेत. निवडणुकीपूर्वी ते भाजपमध्ये होते. मात्र निवडणूक काळात त्यांनी राष्ट्रवादी काँग्रेस (शरद पवार गट)मध्ये प्रवेश केला आणि विजयी झाले.

स्वीकृत नगरसेवकपदी राष्ट्रवादी काँग्रेस (अजित पवार गट)तर्फे माजी नगरसेवक व नगराध्यक्ष ऐश्वर्या पाचर्णे यांचे पती अभिजीत पाचर्णे यांची निवड झाली. मागील टर्ममध्ये ते शिरूर शहर विकास आघाडीच्या वतीने निवडून आले होते. या निवडीमुळे पाचर्णे पती–पत्नी सभागृहात दिसणार आहे. अभिजित पाचर्णे यांचे वडील गणेश पाचर्णे हे शिरूरचे माजी उपनगराध्यक्ष गणेश पाचर्णे यांचे चिरंजीव आहेत.

प्रभाग क्रमांक चारमधून राष्ट्रवादी काँग्रेस (शरद पवार गट)तर्फे निवडणूक लढवलेले अमोल चव्हाण यांना पराभव स्वीकारावा लागला. भाजपचे शहराध्यक्ष नितीन पाचर्णे यांनी त्यांचा पराभव केला. माजी आमदार अशोक पवार यांचे कट्टर समर्थक म्हणून ओळखले जाणारे अमोल चव्हाण यांना नंतर स्वीकृत नगरसेवकपद देण्यात आले.

भाजपतर्फे नगराध्यक्षपदाची निवडणूक लढवलेल्या माजी नगराध्यक्षा सुवर्णा लोळगे यांचे पती राजेंद्र अरुण लोळगे यांची भाजपकडून स्वीकृत नगरसेवक म्हणून निवड झाली. लायन्स क्लबचे माजी अध्यक्ष असलेल्या लोळगे यांनी यापूर्वी नगरसेवकपदाची निवडणूक लढवली होती; मात्र तेव्हा त्यांना अपयश आले होते.स्वीकृत नगरसेवकपदासाठी अनेक इच्छुकांनी प्रयत्न केले होते; मात्र मोजक्यांनाच संधी मिळाल्याने अनेकांचा हिरमोड झाला.