शिरूर तालुक्यात दोन दिवसांत दोन बिबटे जेरबंद; माणिकडोह निवारा केंद्रात रवानगी

शिरूर{ डेली न्यूज पोस्ट टीम 24}: शिरूर तालुक्यात बिबट्यांचा वाढता वावर कायम असून गेल्या दोन दिवसांत वनविभागाने दोन बिबट्यांना सुरक्षितरित्या जेरबंद करून माणिकडोह येथील बिबट केंद्रात रवाना केले आहे.

वनपरिक्षेत्र अधिकारी निळकंठ गव्हाणे यांनी दिलेल्या माहितीनुसार, १८ जुलै रोजी सविंदणे परिसरात सुमारे दीड ते दोन वर्षे वयाची मादी बिबट वनविभागाच्या पिंजऱ्यात जेरबंद झाली. आवश्यक वैद्यकीय तपासणीनंतर तिला माणिकडोह बिबट बचाव केंद्रात हलविण्यात आले.

त्यानंतर १९ जुलै रोजी पहाटे पाच वाजण्याच्या सुमारास करडे (लांडगे वस्ती), ता. शिरूर येथे पाच ते सहा वर्षे वयाचा नर बिबट जेरबंद करण्यात आला. या बिबट्यालाही सुरक्षितपणे माणिकडोह येथे रवाना करण्यात आले.

शिरूर तालुक्यात ऊस क्षेत्राचे वाढलेले प्रमाण, जंगलालगतच्या वस्त्या आणि मुबलक भक्ष्य उपलब्ध असल्यामुळे बिबट्यांचा वावर सातत्याने वाढत आहे. यापूर्वीही तालुक्यात अनेक बिबटे जेरबंद करून माणिकडोह बचाव केंद्रात पाठविण्यात आले आहेत. वनविभागाकडून संवेदनशील भागांमध्ये सातत्याने पाहणी सुरू असून नागरिकांच्या तक्रारींनुसार पिंजरे लावण्याची कार्यवाही केली जात आहे.

वनविभागाने नागरिकांना रात्रीच्या वेळी शेतात किंवा एकांत ठिकाणी जाताना दक्षता घेण्याचे, लहान मुलांना एकटे सोडू नये, तसेच बिबट्याचा वावर आढळल्यास घाबरून न जाता तात्काळ वनविभागाशी संपर्क साधण्याचे आवाहन केले आहे.