एसटी महामंडळाच्या एनसीएमसी (नॅशनल कॉमन मोबिलिटी कार्ड) स्मार्ट कार्डची जादा दराने विक्री करणाऱ्या विक्रेत्यांवर कारवाईचा इशारा

शिरूर : एसटी महामंडळाच्या एनसीएमसी (नॅशनल कॉमन मोबिलिटी कार्ड) स्मार्ट कार्डची जादा दराने विक्री करणाऱ्या विक्रेत्यांवर कठोर कारवाई करण्यात येणार असून, संबंधितांचा परवाना तात्काळ रद्द केला जाईल, असा इशारा परिवहन मंत्री प्रताप सरनाईक यांनी दिला आहे.

महाराष्ट्र राज्य मार्ग परिवहन महामंडळाकडून सवलतधारक प्रवाशांसाठी एनसीएमसी स्मार्ट कार्डचे वितरण राज्यभर सुरू करण्यात आले आहे. यासाठी ३००० हून अधिक अधिकृत विक्रेत्यांची नियुक्ती करण्यात आली असून, सर्व प्रमुख बसस्थानकांवरही ही सुविधा उपलब्ध आहे.

नवीन कार्डसाठी १९९ रुपये, तर पूर्वी स्मार्ट कार्ड असलेल्या प्रवाशांसाठी १४९ रुपये दर निश्चित करण्यात आला आहे. मात्र, काही विक्रेत्यांकडून सवलतधारक प्रवाशांकडून जादा रक्कम आकारली जात असल्याच्या तक्रारी प्राप्त झाल्यानंतर प्रशासनाने ही भूमिका स्पष्ट केली आहे. काही विक्रेत्यांचे परवाने आधीच रद्द करण्यात आल्याची माहितीही सरनाईक यांनी दिली.

दरम्यान, एसटी प्रवास अधिक सुलभ आणि पारदर्शक करण्यासाठी एनसीएमसी प्रणाली लागू करण्यात आली आहे. सध्या महिला, ज्येष्ठ नागरिक आणि ‘अमृत’ योजनेतील प्रवाशांची नोंदणी सुरू असून, पुढील टप्प्यात इतर सवलतधारकांचा समावेश केला जाणार आहे.

लवकरच सर्व सवलतधारकांसाठी एनसीएमसी कार्डचा वापर अनिवार्य करण्याचा निर्णय महामंडळाने घेतला आहे. या माध्यमातून तिकीट वितरण, टॉप-अप आणि इतर व्यवहार एकसंध व डिजिटल पद्धतीने पार पडणार आहेत.

सर्व आगार व्यवस्थापकांना निर्धारित कार्यपद्धती काटेकोरपणे राबविण्याचे निर्देश देण्यात आले असून, प्रवाशांना कोणतीही अडचण येऊ नये यासाठी आवश्यक उपाययोजना करण्याचे आदेश देण्यात आले आहेत. एसटी सेवा अधिक आधुनिक व प्रवासी-केंद्रित करण्याच्या दृष्टीने हा महत्त्वाचा टप्पा असल्याचे सरनाईक यांनी नमूद केले.