शिरूरजवळ ट्रकखाली झोपलेल्या तरुणाचा चिरडून मृत्यू; चालकाविरुद्ध गुन्हा दाखल

शिरूर { डेली न्यूज पोस्ट टीम -24}तालुक्यातील सरदवाडी हद्दीत राजस्थान ढाब्याच्या पार्किंगमध्ये ट्रकखाली झोपलेल्या तरुणाचा चिरडून मृत्यू झाल्याची धक्कादायक घटना समोर आली आहे. या प्रकरणी ट्रक चालकाविरुद्ध शिरूर पोलीस ठाण्यात गुन्हा दाखल करण्यात आला आहे.

पोलीसांकडून मिळालेल्या माहितीनुसार, २३ फेब्रुवारी रोजी पहाटेच्या सुमारास ही घटना घडली. ट्रक क्रमांक TN-88-M-1864 चालवित असलेला आरोपी बालसुब्रम्हण्यम मुर्गेशन (रा. तिरुचिरापल्ली, तामिळनाडू) याने निष्काळजीपणे व बेदरकारपणे वाहन चालविताना पार्किंगमध्ये ट्रकखाली झोपलेल्या योगेश आसाराम साठे (वय २९, रा. जालना) याला चिरडले. ट्रकचे मागील चाक साठे यांच्या कंबरेखालील भागावरून गेल्याने त्यांना गंभीर दुखापत होऊन मृत्यू झाला.

घटनेनंतर चालकाने कोणतीही मदत न करता घटनास्थळावरून पलायन केल्याचेही समोर आले आहे. या प्रकरणी शिरूर पोलीस ठाण्यात गुन्हा रजिस्टर क्रमांक २५७/२०२६ नुसार भा.न्या.सं. कलम १०६(१), २८ तसेच मोटार वाहन कायद्यान्वये कलम १८४, १३४/१७७ अंतर्गत गुन्हा दाखल करण्यात आला आहे.

या प्रकरणाची फिर्याद पोलीस उपनिरीक्षक राजेंद्र बनकर यांनी दिली असून पुढील तपास पोलीसांकडून सुरू आहे. प्रभारी अधिकारी संदेश केंजळे यांच्या मार्गदर्शनाखाली अधिक तपास सुरू असून आरोपीचा शोध घेतला जात आहे.