शिरूर (डेली न्यूज पोस्ट टीम -24) –
पुणे-अहिल्यानगर महामार्गावर कारेगाव येथे सोमवारी (दि. २५ ऑगस्ट) सकाळी साडेअकरा वाजता झालेल्या अपघातात रत्नदीप कृष्णा सावळे ( रा. ढोक सांगवी, ता. शिरूर) या युवकाचा मृत्यू झाला, तर त्यांची सासूबाई शशिकला सहादेवराव बर्डे (वय ७०, रा. हातोला, ता. दारव्हा, जि. यवतमाळ) गंभीर जखमी झाल्या.पोलीसांनी दिलेल्या माहितीनुसार, मृत रत्नदीप सावळे आपल्या मोटारसायकलवरून (क्र. एम.एच
– ३७ ए.सी. ९४८८) सासू शशिकला बर्डे यांना घेऊन शिरूरकडे जात होते.

त्यावेळी विरुद्ध दिशेने वेगात येणारा सोनालिका ट्रॅक्टर (क्र. एमएच १६ बीझेड ८४१५) रस्त्यावरील नियमांकडे दुर्लक्ष करून चालकाने अचानक डिव्हायडरकडे घेतल्याने त्याच्या ट्रॉलीची जोरदार धडक मोटारसायकलला बसली. या अपघातात रत्नदीप यांचा जागीच मृत्यू झाला, तर शशिकला बर्डे गंभीर जखमी झाल्या असून त्यांच्यावर उपचार सुरू आहेत. अपघातात मोटारसायकलचे मोठे नुकसान झाले आहे.

या संदर्भात फिर्यादी निरंजन चंपतराव सावळे यांनी दिलेल्या तक्रारीनुसार पोलिस ठाण्यात गुन्हा रजि. नं. ३००/२०२५, भा.न्या.सं. कलम १०६(१), २८१, १२५(अ)(ब), एमव्ही अ‍ॅक्ट १८४, १३४, १७७ प्रमाणे ट्रॅक्टरचालकाविरुद्ध गुन्हा दाखल करण्यात आला आहे.

या अपघाताचा तपास पोलीस निरीक्षक महादेव वाघमोडे यांच्या मार्गदर्शनाखाली पोलीस उपनिरीक्षक अनिल चव्हाण करत आहे