भरधाव दुचाकी ओव्हरटेक करताना समोरासमोर धडक; तरुणाचा मृत्यू, एक जखमी

शिरूर {डेली न्यूज पोस्ट टीम 24}कवठे येमाई–रोडेवाडी फाटा मार्गावरील अष्टविनायक महामार्गावर भरधाव वेगाने दुचाकी चालवत असताना ओव्हरटेक करण्याच्या प्रयत्नात समोरून येणाऱ्या दुचाकीला धडक बसून झालेल्या अपघातात २४ वर्षीय तरुणाचा मृत्यू झाला, तर दुसरा दुचाकीस्वार जखमी झाला. ही घटना सोमवारी (१२ जानेवारी) रात्री साडेआठच्या सुमारास काळुबाई नगर, कैलास इचके यांच्या घराजवळ घडली.किरण देवीनाथ जोगी (वय २४, रा. लादवास, ता. मांडल, जि. भिलवाडा, राजस्थान) असे मृत तरुणाचे नाव आहे. या प्रकरणी राजू श्रीराम गाड्री (वय २८, व्यवसाय आईस्क्रीम विक्री) यांनी शिरूर पोलीस ठाण्यात फिर्याद दिली आहे.

फिर्यादी व त्यांचा चुलत भाऊ किरण जोगी हे कवठे येमाई येथील फुलाई हॉटेलमध्ये असतात. किरण हा आईस्क्रीमसाठी लागणारा बर्फ आणण्यासाठी हिरो एच. एफ. डिलक्स (एमएच १२ सीबी २४१६) या दुचाकीवर पारगावकडे गेला होता. रात्री साडेआठच्या सुमारास किरणचा अपघात झाल्याची माहिती मिळाल्यानंतर फिर्यादी घटनास्थळी पोहोचले. तेथे किरण जोगी व दुसरा दुचाकीस्वार सिताराम काशिनाथ शेट्टे (वय ५४, रा. संविदणे, ता. शिरूर) हे दोघेही रस्त्यावर पडलेले व त्यांच्या दुचाकी समोरासमोर धडकलेली आढळून आल्या.

प्राथमिक माहितीनुसार, किरण जोगी हा रोडेवाडी फाट्याकडून कवठे येमाईच्या दिशेने येत असताना अज्ञात वाहनाला ओव्हरटेक करण्याचा प्रयत्न करीत होता. याच वेळी समोरून येणाऱ्या सिताराम शेट्टे यांच्या बजाज डिस्कव्हर (एमएच १४ एडब्ल्यू ९३९१) दुचाकीला जोरदार धडक बसली. या अपघातात दोघांनाही गंभीर व किरकोळ दुखापती झाल्या असून दोन्ही दुचाकींचे नुकसान झाले.

जखमी सिताराम शेट्टे यांना उपस्थित नागरिकांनी पारगाव येथील हॉस्पिटलमध्ये दाखल केले, तर किरण जोगी यांना शिरूर येथील शासकीय रुग्णालयात नेण्यात आले. मात्र, तपासणीनंतर डॉक्टरांनी किरण जोगी यांना मृत घोषित केले.

या प्रकरणी शिरूर पोलीस ठाण्यात बीएनएसएस कलम १९४ अंतर्गत अपघाती मृत्यूची नोंद करण्यात आली असून पुढील तपास पोलीस हवालदार वारे करीत आहेत.