लाखो रुपयांच्या केबल वायर चोरी करणाऱ्या टोळीचा पर्दाफाश करण्यात र पोलिसांना यश

शिरूर { डेली न्यूज पोस्ट टीम 24}: रांजणगाव एमआयडीसी परिसरातील कंपनीतून लाखो रुपयांच्या केबल वायर चोरी करणाऱ्या टोळीचा पर्दाफाश करण्यात रांजणगाव एमआयडीसी पोलिसांना यश आले आहे. या प्रकरणी चार आरोपींना अटक करण्यात आली असून सुमारे १८ लाख रुपयांचा मुद्देमाल जप्त करण्यात आला आहे. तसेच दोन गुन्हे उघडकीस आले आहेत.

दि. ०२ फेब्रुवारी २०२६ रोजी रात्री रांजणगाव एमआयडीसी पोलीस स्टेशन हद्दीतील संजणगाव, खंडाळे माथा (ता. शिरूर, जि. पुणे) येथील ‘स्पर्श इलेक्ट्रॉनिक’ कंपनीमधून अज्ञात चोरट्यांनी केबल वायरचे बंडल चोरून नेल्याची घटना घडली होती. याबाबत अर्कैज रामराव शिंदे (रा. शिक्रापूर, ता. शिरूर) यांच्या फिर्यादीवरून गुन्हा दाखल करण्यात आला होता.

पोलीस निरीक्षक महादेव वाघमोडे यांच्या मार्गदर्शनाखाली तपास पथकाने गुन्ह्याचा तपास सुरू केला. पोलीस उपनिरीक्षक अविनाश थोरात, सहा फौजदार दत्तात्रय शिंदे, पोलीस अंमलदार उमेश कुतवळ, योगेश गुंड, किशोर शिवणकर यांनी कौशल्याने तपास करत रांजणगाव, शिक्रापूर व परिसरातील ५० हून अधिक सीसीटीव्ही फुटेजची तपासणी केली.

दरम्यान, पोलीस अंमलदार उमेश कुतवळ यांना मिळालेल्या गोपनीय माहितीच्या आधारे तळेगाव ढमढेरे येथील तिघेजण कंपनीतील केबल वायर चोरीत सहभागी असल्याचे समोर आले. तांत्रिक विश्लेषणाच्या आधारे आरोपींचा माग काढत पोलिसांनी १) विकास संतोष पवार (वय २७, रा. मुखई, इंदिरानगर, ता. शिरूर), २) रोहित गणेश शिंदे (वय २०, रा. तळेगाव ढमढेरे, ता. शिरूर), ३) ओमकार फकीरया काळे (वय २०, रा. तळेगाव ढमढेरे) यांना शिताफीने ताब्यात घेतले.

सखोल चौकशीत आरोपींनी चोरीची कबुली दिली. तसेच चोरी केलेला माल फैजान इमरान खान (वय २३, रा. कोंढवा खुर्द, पुणे) याला विक्री केल्याचे सांगितले. त्यानुसार फैजान खान यालाही अटक करण्यात आली.

आरोपींकडून चोरीचा केबल माल, गुन्हा करण्यासाठी वापरलेली मालवाहू कॅरी वाहन व दोन मोटारसायकली असा एकूण १८,००,००० रुपयांचा मुद्देमाल जप्त करण्यात आला आहे. तसेच ऑगस्ट २०२५ मध्येही याच कंपनीत चोरी केल्याचे निष्पन्न झाले असून आणखी गुन्हे उघड होण्याची शक्यता पोलिसांनी व्यक्त केली आहे.

ही कारवाई पोलीस अधीक्षक संदीपसिंह गिल्, अप्पर पोलीस अधीक्षक रमेश चोपडे, उपविभागीय पोलीस अधिकारी प्रशांत ढोले यांच्या मार्गदर्शनाखाली करण्यात आली. पुढील तपास सहाय्यक फौजदार दत्तात्रय शिंदे करीत आहेत.