शिरूर : ( डेली न्यूज पोस्ट टीम -२४) – “शिकण्याची उर्मी असेल तर वय कधीच अडसर ठरत नाही,” हे अगदी खरे करून दाखवले आहे शिरूरचे बाबूराव कोंडिंबा पाचंगे यांनी. वयाच्या ६३व्या वर्षी त्यांनी विधीची  पदवी प्राप्त करत वकिलीचे स्वप्न साकार केले आहे.
पाचंगे यांनी पुणे आयटीआयमधून प्रिटिंगचा कोर्स पूर्ण करून, ‘शक्ती प्रिंटर्स’ या व्यवसायाच्या माध्यमातून यशस्वी उद्योजकतेचा पाया रचला. व्यवसायात सचोटी, मेहनत आणि गुणवत्तेच्या जोरावर त्यांनी मोठं यश मिळवलं. सामाजिक कार्यातही सक्रिय राहून, मुद्रक संघटनात काम करत, राज्यातील पहिले ‘भीमाशंकर प्रिटिंग क्लस्टर’ उभारण्यात त्यांचा मोठा सहभाग राहिला.
व्यवसायाच्या व्यापात असूनही उच्च शिक्षणाची ओढ त्यांनी कधीच सोडली नाही. यशवंतराव चव्हाण महाराष्ट्र मुक्त विद्यापीठामार्फत त्यांनी बी.ए. (समाजशास्त्र) पदवी प्राप्त केली. पुढे अहिल्यानगरच्या सी.डी. देशमुख विधी महाविद्यालयात प्रवेश घेत विधी शिक्षण पूर्ण करून यंदा वकिलीच्या परीक्षेत यश मिळवले.
बाबूराव पाचंगे यांनी सांगितले की खरेतर साठी (६०) ही सेवानिवृत्त्तीचे वय पण या सेवानिवृत्त्तीचा वयात बी . ए . ची पदवी मिळवून ६३ व्या वर्षी वकिलीची पदवी प्राप्त केली . मला परिस्थितीमुळे व इतर काही अडचणीमुळे कॉलेज जीवन व उच्च शिक्षण पूर्ण करता आले नाही. आपले पदवीचे शिक्षण पूर्ण व्हावे व पदवी मिळावी असे स्वप्न होते व या स्वप्ना पर्यत जाण्याचा मार्ग सापडत नव्हता. अश्या वेळी चांदमल ताराचंद बोरा महाविद्यालयातील मुक्त विद्यापीठाचे केंद्र संयोजक प्रा. चंद्रकांत धापटे व प्रा . सतिश धुमाळ यांची भेट झाली. परिस्थिती व अन्य कारणामुळे ज्यांना पदवीचे शिक्षण पूर्ण करता येत नाही असे विद्यार्थी, नागरिक हे मुक्त विद्यापीठाच्या माध्यमातून शिक्षण पूर्ण करु शकतात तुम्ही ॲडमिशन घ्या असे त्यानी सांगितले व माझ्या पदवीकडे जाण्याचा मार्ग निश्चित झाला असे पाचंगे यांनी सांगितले. बोरा महाविद्यालयाच्या  मुक्त विद्यापीठाच्या अभ्यास केंद्रावर ॲडमिशन घेतले. कामाचा व्याप, वाढते वय ,यामुळे अभ्यासाचा ताण येत होता पण कोणत्याही परिस्थितीत पदवीचे स्वप्न साकारायचे ही जिद्द, या सर्व
अडचणींवर , ताणांवर मात करण्यास उपयुक्त ठरली. पत्नी वत्सला ,मुलगा सूरज ,सून सान्वी ,मुलगी वर्षा व जावई तहसिलदार डॉ .अरविंद घेमूड व प्रा. संदिप जाधव , ॲड . गणेश सटाले , ॲड . अनिकेत पाचर्णे यानी ही शिकण्यासाठी प्रोत्साहन दिले .त्याच बरोबर शिरुर शिक्षण प्रसारक मंडळाचे सचिव नंदकुमार निकम व बोरा महाविद्यालयाचे प्राचार्य डॉ. के. सी. मोहिते , प्रा डॉ . अंबादास केत यांनी ही मौलिक मार्गदर्शन केले. त्याच बरोबर शाहू शिक्षण संस्थेचे विश्वस्त ॲड . नारायणराव साठे, सी . डी देशमुख विधी महाविद्यालयाचे माजी प्राचार्य ॲड . रियाज बेग, प्राचार्य ॲड
सारंग गणबोटे या सर्वान मुळे अभ्यास करण्यास व शिकण्यास प्रोत्साहन मिळाले आणि आपले पदवीचे स्वप्न साकारल्याचे त्यांनी सांगितले .
पाचंगे यांनी समाजशास्त्र या विषयातून बी. ए. ची पदवी प्राप्त केल्यावर नाशिक येथील पदवी प्रदान सोहळ्याच्या वेळी ६० व्या वर्षी पदवीचे स्वप्न साकारणा-या या विद्यार्थ्याचे राज्याचे तत्काळीन उच्च शिक्षणमंत्री डॉ. उदय सामंत, कुलगुरु डॉ. प्रशांतकुमार पाटील, माजी कुलगुरु डॉ. चारुदत्त माही, यशवंतराव चव्हाण महाराष्ट्र मुक्त विद्यापीठ व्यवस्थापन परिषदेचे सदस्य डॉ. ए. पी. कुलकर्णी, मुक्त विद्यापीठाचे पुणे विभागीय संचालक डॉ. गौतम बेंगाळे यांनी अभिनंदन केले होते .
वकिलीचे शिक्षण पूर्ण करुन पाचंगे त्यादवारे समाजाची वकिली करीत समाजसेवा करणार असून ग्रामीण भागातील लोकांना साध्या सोप्याभाषेत कायदेविषयक मार्गदर्शन करणार
आहेत .
“प्रामाणिक प्रयत्न, जिद्द आणि शिक्षणाची ओढ असेल, तर वयाची कुठलीच अडचण यशाला थांबवू शकत नाही,” असे पाचंगे आवर्जून सांगतात.