शिरूर { डेली न्यूज पोस्ट टीम 24}तालुक्यातील भांबर्डे येथे आईनेच आपल्या ११ महिन्यांच्या मुलाचा निर्घृण खून केल्याची धक्कादायक घटना उघडकीस आली असून परिसरात एकच खळबळ उडाली आहे. या प्रकरणी रांजणगाव एमआयडीसी पोलिसांनी आईला अटक केली आहे.
याबाबत पोलिसांनी दिलेल्या माहितीनुसार यश रविंद्र पवार वय ११ महिने असे मृत मुलाचे नाव असून याप्रकरणी वडील रवींद्र अशोक पवार (रा. भांबर्डे, ता. शिरूर) यांनी फिर्याद दिली आहे. त्यानुसार सौ. पूजा रवींद्र पवार हिच्याविरुद्ध खुनाचा गुन्हा दाखल करण्यात आला आहे.
८ मार्च रोजी सायंकाळच्या सुमारास भांबर्डे येथील शेतातील विहिरीजवळ ही घटना घडली. सुरुवातीला हा प्रकार अकस्मात मृत्यू म्हणून नोंदविण्यात आला होता. मात्र पोलिसांनी सखोल तपास केला असता धक्कादायक बाब समोर आली. संशयित आईनेच मुलाचा खून केल्याची कबुली दिल्याचे समोर आले आहे.
पोलिसांच्या तपासात आरोपी महिलेने मुलाचे डोके घरासमोरील सिमेंटच्या ओट्यावर आपटून त्याचा खून केल्याचे स्पष्ट झाले. त्यानंतर पुरावा नष्ट करण्याच्या उद्देशाने रक्त धुऊन काढून मृतदेह कपड्यांच्या बॅगमध्ये भरला. पुढे शेतातील विहिरीत बुडवण्यासाठी बॅगमध्ये दगड टाकून ती पाण्यात फेकून दिल्याचेही निष्पन्न झाले आहे.
या प्रकरणी भारतीय न्याय संहिता २०२३ मधील संबंधित कलमान्वये गुन्हा दाखल करण्यात आला असून आरोपी महिलेला अटक करण्यात आली आहे. घटनास्थळी उपविभागीय पोलीस अधिकारी प्रशांत ढोले, पोलीस निरीक्षक महादेव वाघमोडे यांच्यासह पोलिस पथकाने भेट देऊन पंचनामा केला. तसेच वैद्यकीय अधिकारी व फॉरेन्सिक पथकानेही तपासात सहभाग घेतला.
या अमानुष घटनेमुळे शिरूर तालुक्यात संताप व्यक्त होत असून पुढील तपास पोलीस करत आहेत.
चौकट
मुलगा हा नेहमी किरकिर करून रडतो, कोठेतरी निघून जाऊन दुसरा चांगला नवरा पाहून लग्न करावे, मुलाला सोबत घेऊन गेल्यावर कोणी लग्न करणार नाही असा विचार करून तिने हा प्रकार केल्याचे पोलिसांनी सांगितले.
शिरूर { डेली न्यूज पोस्ट टीम 24}तालुक्यातील भांबर्डे येथे आईनेच आपल्या ११ महिन्यांच्या मुलाचा निर्घृण खून केल्याची धक्कादायक घटना उघडकीस आली असून परिसरात एकच खळबळ उडाली आहे. या प्रकरणी रांजणगाव एमआयडीसी पोलिसांनी आईला अटक केली आहे.
