अवैध दारूधंद्यांवर शिरूर पोलिसांचा मोठा प्रहार; तीन हातभट्ट्या उद्ध्वस्त, पाच जणांवर गुन्हे

शिरूर { डेली न्यूज पोस्ट टीम 24}तालुक्यात सुरू असलेल्या अवैध गावठी हातभट्टी दारू निर्मिती आणि विक्रीविरोधात शिरूर पोलिसांनी गुरुवारी (दि. २९) मोठी मोहीम राबवत विविध ठिकाणी धडक कारवाया केल्या. तीन ठिकाणी सुरू असलेल्या हातभट्ट्या उद्ध्वस्त करण्यात आल्या, तर दोन ठिकाणी गावठी दारूची विक्री करणाऱ्यांवर कारवाई करण्यात आली. या कारवाईत एकूण पाच जणांविरुद्ध गुन्हे दाखल करण्यात आले असून हजारो लिटर रसायन नष्ट करण्यात आले आहे.

पोलीसांनी न्हावरे येथील आलेगाव फाटा परिसरात छापा टाकून विजय विश्वनाथ जाधव याला गावठी हातभट्टीची दारू तयार करताना पकडले. या कारवाईत ४५० लिटर रसायन, ५ लिटर तयार दारू तसेच दारूनिर्मितीचे साहित्य जप्त करून सुमारे २३ हजार रुपयांचा मुद्देमाल नष्ट करण्यात आला.

त्यानंतर डोंगरगण येथील घोडनदी परिसरात संतोष जाधव याच्या ठिकाणी छापा टाकण्यात आला. येथे १२०० लिटर रसायन, ३५ लिटर तयार दारू, ५ लिटर ताडी आणि दारूनिर्मितीचे साहित्य आढळून आले. सुमारे १ लाख २४ हजार रुपयांचा मुद्देमाल जागीच नष्ट करण्यात आला.

नागरगाव येथे स्थानिक गुन्हे शाखा आणि शिरूर पोलिसांच्या संयुक्त पथकाने रेश्मा संतोष चौगुले हिच्या ठिकाणी कारवाई करत ८०० लिटर रसायन, बॅरल्स आणि दारूनिर्मितीचे साहित्य जप्त केले. सुमारे ४० हजार रुपयांचा मुद्देमाल नष्ट करण्यात आला.

दरम्यान, न्हावरे येथे मंदाबाई शरद गव्हाणे हिच्याकडून १५ लिटर गावठी दारू जप्त करण्यात आली. तसेच शिरूर शहरातील ढोरआळी परिसरात मंगल भाऊसाहेब गव्हाणे हिच्याकडून ७ लिटर गावठी दारू जप्त करण्यात आली. या दोन्ही महिलांविरुद्धही महाराष्ट्र दारूबंदी कायद्यान्वये गुन्हे दाखल करण्यात आले आहेत.

या मोहिमेत पोलिसांनी एकूण सुमारे २४५० लिटर रसायन, मोठ्या प्रमाणात तयार दारू आणि दारूनिर्मितीचे साहित्य नष्ट केले. अवैध दारूधंद्यांविरोधातील ही कारवाई आगामी काळात अधिक तीव्र करण्यात येणार असल्याचे पोलिसांनी स्पष्ट केले आहे.

पोलीस अधीक्षक संदीप गिल, अपर पोलीस अधीक्षक डॉ. शिवमकुमार आणि उपविभागीय पोलीस अधिकारी प्रशांत ढोले यांच्या मार्गदर्शनाखाली पोलीस निरीक्षक संदेश केंजळे, स्थानिक गुन्हे शाखेचे पोलीस निरीक्षक प्रमोद क्षीरसागर तसेच शिरूर पोलीस ठाणे व स्थानिक गुन्हे शाखेच्या पथकांनी ही कारवाई केली.

अवैध दारूभट्ट्या, दारू विक्री किंवा अन्य बेकायदा व्यवसायांबाबत नागरिकांनी पोलिसांना तातडीने माहिती द्यावी. माहिती देणाऱ्यांची ओळख गोपनीय ठेवली जाईल, असे आवाहन पोलिसांनी केले आहे.