जुन्या भांडणातून युवकाचा निर्घृण खून; आरोपी जेरबंद

शिरूर {डेली न्यूज पोस्ट टीम -24} जुन्या वैमनस्यातून शिरूर शहरात एका तरुणाचा दगडाने ठेचून खून करण्यात आला. या खुनाच्या घटनेनंतर  शिरूर पोलिसांच्या डीबी पथकाने आणि पुणे ग्रामीण स्थानिक गुन्हे शाखेने तिघा आरोपींना जेरबंद केले.
पोलीसांनी दिलेल्या माहितीनुसार, दिनांक ८ ऑक्टोबर २०२५ रोजी दुपारी १.०० ते ५.४५ या वेळेत शिरूर बायपास उड्डाण पुला जवळील जमिनीलगतच्या वॉल कंपाउंड परिसरात ही घटना घडली.
संतोष मारूती ढोबळे (वय २०, रा. वाडा कॉलनी, शिरूर) याला त्याचे परिचित सचिन विलास मांमडवाड (वय २४, रा. सिद्धार्थनगर, शिरूर), यश उर्फ श्रेयस महेश मांदीलकर (वय २०, रा. साईनगर, शिरूर) व त्यांचा एक साथीदार यांनी बोलावून घेतले. त्यानंतर अज्ञात कारणावरून वाद होऊन त्यांनी ढोबळे याच्या डोक्यात आणि चेहऱ्यावर दगडाने मारहाण केली. या मारहाणीमध्ये संतोष ढोबळे याचा जागीच मृत्यू झाला.
या प्रकरणी शिरूर पोलिस ठाण्यात गुन्हा र. नं. ७१३/२०२५, भा. न्या. संहिता कायदा २०२३ चे कलम १०३(१), ३(५) अन्वये गुन्हा दाखल करण्यात आला.
घटनेची गंभीरता लक्षात घेऊन उपविभागीय पोलीस अधिकारी प्रशांत ढोले, पोलीस निरीक्षक संदेश केंजळे आणि स्थानिक गुन्हे शाखेचे पोलीस निरीक्षक अविनाश शिळीमकर यांच्या मार्गदर्शनाखाली तपासाची चक्रे वेगाने फिरवण्यात आली.
डीबी पथकातील पोलीस उपनिरीक्षक शुभम चव्हाण, सागर शेळके, तसेच स्थानिक गुन्हे शाखेचे पोलीस हवालदार तुषार पंधारे, जनार्दन शेळके, राजू मोमीन, संजू जाधव आणि अन्य अंमलदारांनी आरोपींच्या शोधासाठी स्वतंत्र पथके तयार केली.
तांत्रिक विश्लेषण, सीसीटीव्ही फुटेज आणि बातमीदाराच्या माहितीद्वारे तपास करत असताना पोलिसांना खात्रीशीर माहिती मिळाली की आरोपी साईनगर परिसरात लपून बसले आहेत. त्यानंतर पोलिसांनी सापळा रचून सचिन मांमडवाड, यश मांदीलकर आणि त्यांचा एक विधीसंघर्षित बालक साथीदार यांना शिताफीने ताब्यात घेतले. चौकशीअंती त्यांनी जुना वाद डोक्यात ठेवून खून केल्याची कबुली दिली.
अटक करण्यात आलेल्या दोन्ही आरोपींना न्यायालयासमोर हजर केले असता त्यांना १५ ऑक्टोबर २०२५ पर्यंत पोलीस कोठडी मंजूर करण्यात आली. विधीसंघर्षित बालकास बालन्यायमंडळ, येरवडा येथे नेण्यात आले . या प्रकरणाचा पुढील तपास पोलीस उपनिरीक्षक राहुल भागवत करत आहेत.
ही संपूर्ण कारवाई पोलीस अधीक्षक संदिप गिल्, अप्पर पोलीस अधीक्षक रमेश चोपडे, .उपविभागीय पोलीस अधिकारी प्रशांत ढोले, पोलीस निरीक्षक अविनाश शिळीमकर, पोलीस निरीक्षक संदेश केंजळे यांच्या मार्गदर्शनाखाली करण्यात आली.
या पथकात पोलीस उपनिरीक्षक शुभम चव्हाण, सागर शेळके, राहुल भागवत, हनमंत नकाते, गोविंद खटींग, हवालदार नितीन सुद्रीक, परसराम सांगळे, अक्षय कळमकर, सचिन भोई, विजय शिंदे, नितेश थोरात, निखील रावडे, निरज पिसाळ, अंबादास थोरे, अन्य पाटील, रविंद्र काळे, वैभव शेलार, रविंद्र आव्हाड यांचा सहभाग होता.
या धडाकेबाज कारवाईबद्दल शिरूर व परिसरातील नागरिकांकडून पोलिसांच्या कार्याचे कौतुक होत आहे.