शिरूरकरांनी घेतला आकाशदर्शनाचा अनुभव

शिरूर { डेली न्यूज पोस्ट टीम 24}चांदमल ताराचंद बोरा महाविद्यालयाच्या प्रांगणावर भौतिकशास्त्र व बी. व्होक. (रिन्यूएबल एनर्जी) विभागाच्या वतीने आयोजित आकाशदर्शन कार्यक्रमा अंतर्गत शिरूरकरांनी व विद्यार्थ्यांनी टेलिस्कोपच्या सहाय्याने आकाशदर्शन केले.

     यावेळी कार्यक्रमाच्या अध्यक्षस्थानी महाविद्यालयाचे प्राचार्य डॉ. के. सी. मोहिते होते, तर शिरूर शिक्षण प्रसारक मंडळाचे प्रशासकीय अधिकारी संजय देशपांडे यांची प्रमुख उपस्थिती होती.

प्राचार्य डॉ. मोहिते म्हणाले की या उपक्रमात विद्यार्थ्यांसह नागरिकांना दुर्बिणीच्या सहाय्याने आकाशातील तारे, ग्रह व विविध खगोलीय घटकांचे प्रत्यक्ष दर्शन घडवणे . अंतराळ विज्ञानाविषयी जिज्ञासा वाढविणे, वैज्ञानिक दृष्टीकोन विकसित करणे आणि खगोलशास्त्राची आवड निर्माण करणे हा या कार्यक्रमाचा मुख्य उद्देश आहे.

या आकाशदर्शन कार्यक्रमात शिरूर शहरातील पाच ते सहा शाळांमधील सुमारे ४५० ते ५०० विद्यार्थ्यांनी सहभाग घेतला. पुण्यातील प्रसिद्ध आयुका संस्थेचे तुषार पुरोहित, महारुद्र मते आणि रुपेश लबडे यांनी आकाशगंगा, ग्रह व तारे याविषयी विद्यार्थ्यांना सविस्तर माहिती दिली. त्यानंतर महाविद्यालयाच्या प्रांगणात टेलिस्कोपच्या साहाय्याने विविध ग्रह व तार्‍यांचे प्रत्यक्ष दर्शन घडवण्यात आले.या उपक्रमात विद्यार्थ्यांसह पालक आणि शिरूरमधील विज्ञान प्रेमी नागरिकांनीही मोठ्या संख्येने सहभाग नोंदवत आकाशदर्शनाचा आनंद घेतला. विज्ञानाबद्दलची उत्सुकता वाढवणारा हा उपक्रम विद्यार्थ्यांसाठी प्रेरणादायी ठरला.कार्यक्रमाचे प्रास्ताविक समन्वयक डॉ. डी. एच. बोबडे यांनी केले. सूत्रसंचालन प्रा. सुनील कवादे यांनी केले, तर डॉ. सुभाष पांढरकर यांनी आभार मानले.