शिरूरच्या पंचायत समितीवर राष्ट्रवादी काँग्रेसचे वर्चस्व. भाजपचे ५ तर एक अपक्ष विजयी

शिरूर :शिरूर पंचायत समितीच्या निवडणुकीत भाजप आणि राष्ट्रवादी काँग्रेस यांच्यात चुरशीची लढत झाली. राष्ट्रवादी काँग्रेसने 14 पैकी आठ जागा मिळवत पंचायत समितीवर सत्ता प्रस्थापित केली. भाजपाला पाच तर एक अपक्ष उमेदवार निवडून आला. दोन्ही शिवसेनेला खातेही उघडता आले नाही

पंचायत समिती निवडणुकीचे पार्श्वभूमीवर अनेक जणांनी पक्षातर करत निवडणूक रिंगणामध्ये उमेदवारी दाखल केली होती.पक्षातर करून अनेकांना यश मिळाले आहे. या निवडणुकीसाठी राष्ट्रवादी काँग्रेसचे दोन्ही गट एकत्रित झाले होते साहजिकच यामुळे राष्ट्रवादीचे काँग्रेसची ताकद ही वाढली.तर उपमुख्यमंत्री अजित पवार यांच्या निधनामुळे निर्माण झालेली सहानभूती ही पक्षाच्या विजयात महत्वाची ठरली. या निवडणुकीत 14 पैकी ८ जागावर विजय मिळवीत राष्ट्रवादी काँग्रेसने पंचायत समितीवर घड्याळाची सत्ता आणली.तर भाजपाला ५ अपक्षाला एक जागा मिळाली. दोन्ही शिवसेनेला कोठे ही खाते उघडता आले नाही.

 निवडणुकीपूर्वी शिवसेना शिंदे पक्षाचे तालुकाध्यक्ष रामभाऊ सासवडे शिरूर ग्रामीणचे भाजपचे माजी सरपंच विठ्ठल घावटे यांनी राष्ट्रवादी काँग्रेसमध्ये प्रवेश केला. सासवडे यांनी शिक्रापूर गणातून तर विठ्ठल घावटे यांच्या पत्नी स्वाती घावटे यांनी शिरूर ग्रामीण मधून निवडणूक लढवली व विजयी झाले .

  टाकळी हाजी व कवठे येमाई राष्ट्रवादी काँग्रेसचा बालेकिल्ला माजी आमदार पोपटराव गावडे यांचे चिरंजीव राजेंद्र गावडे यांच्या भाजप प्रवेशा मुळे उध्वस्त झाला. या ठिकाणी प्रथमच भाजपचे कमळ फुलले सुनिता कड व कांचन सांडभोर विजयी झाल्या.

 शिरूर ग्रामीण हा माजी आमदार बाबुराव पाचर्णे यांचा बालेकिल्ला मानला जात होता. येथे राष्ट्रवादी काँग्रेसच्या स्वाती घावटे यांनी विजय मिळविला.

तर न्हावरा पंचायत समिती गणातून ही राष्ट्रवादी काँग्रेसचे दीपक पवार विजयी झाले.

 रांजणगाव गणपती पंचायती समिती गटात भाजपचे सागर देवकर यांनी बाजी मारली तर कारेगाव पंचायत समिती गणातून राष्ट्रवादी काँग्रेस युवतीच्या पदाधिकारी माजी सरपंच निर्मला नवले यांना पराभवाचा धक्का बसला. या ठिकाणी भाजपाच्या उमेदवार माजी पंचायत समिती सदस्य मनीषा पाचंगे यांनी कमळ फुलवले.

पाबळ पंचायत समिती गणातून राष्ट्रवादी काँग्रेसच्या उमेदवार व बाजार समितीचे माजी सभापती प्रकाश पवार यांच्या पत्नी वंदना पवार या विजयी झाल्या. तर केंदुर गणातून ही राष्ट्रवादी काँग्रेसच्या सुचेत्रा थिटे या विजयी झाल्या.

रांजणगाव सांडस व तळेगाव गणात अनुक्रमे राष्ट्रवादी काँग्रेसचे विजय रणसिंग व भाजपच्या विद्या राजेंद्र भुजबळ या विजयी झाल्या भाजपच्या भुजबळ यांनी राष्टवादी काँग्रेसचे नेते महेश ढमढेरे यांच्या पत्नी शोभा ढमढेरे यांचा पराभव केला.

शिक्रापूर पंचायत समिती गणातून राष्ट्रवादी काँग्रेसचे रामभाऊ सासवडे तर सणसवाडी गणातून अपक्ष उमेदवार कोमल ढेरंगे विजयी झाल्या.

 मांडवगण फराटा पंचायत समिती गणातून राष्ट्रवादी काँग्रेसच्या संगीता फराटे विजयी झाल्या. तर वडगाव रासाई गणातून ही राष्ट्रवादी काँग्रेसचे विकास शेलार विजयी झाले.या गणातून शिवसेनेचे ठाकरे पक्षाचे तालुकाध्यक्ष पोपटराव शेलार यांना पराभव स्वीकारावा लागला त्याचबरोबर स्वाभिमानी विकास आघाडीच्या माध्यमातून निवडणूक रिंगणात उभे राहिलेले बाजार समितीचे माजी संचालक विजेंद्र गद्रे यांना पराभव स्वीकारावा लागला.