शिरूरची लेक पुण्याच्या महापौरपदी, शिरूरकरानी व्यक्त केला आनंद  

शिरूर { डेली न्यूज पोस्ट 24}शिरूरच्या लेकीला पुणे महानगरपालिकेच्या महापौरपदाचा मान मिळताच शिरूर शहरात आनंद, अभिमान आणि भावनिक वातावरण दाटून आले आहे. पुणे महानगरपालिकेच्या नुकत्याच पार पडलेल्या निवडणुकीत भारतीय जनता पक्षाला स्पष्ट बहुमत मिळाले असून, यंदाचे महापौरपद सर्वसाधारण महिला गटासाठी राखीव होते. त्यामुळे या पदासाठी मोठी उत्सुकता निर्माण झाली होती. अखेर शिरूरची कन्या मंजुषा नागपुरे यांची महापौरपदी निवड होताच शिरूरकरांचा ऊर अभिमानाने भरून आला.

पूर्वाश्रमीच्या मंजुषा परदेशी यांचे बालपण, शालेय तसेच महाविद्यालयीन शिक्षण शिरूर शहरातच झाले. येथील चांदमल ताराचंद बोरा महाविद्यालयातून त्यांनी वाणिज्य शाखेची पदवी संपादन केली. त्यानंतर काही काळ त्यांनी नोकरीही केली. सर्वसामान्य कुटुंबात वाढलेल्या मंजुषा नागपुरे या दिवंगत बेबी परदेशी व श्री.रतनसिंग परदेशी यांच्या कन्या तर दिवगंत किशोर परदेशी यांच्या भाची होत.त्याच्या आई या येथील रामलिंग महाराज यांच्या कट्टर भक्त त्याचबरोबर परिसरातील विविध धार्मिक सामाजिक कार्यात सक्रिय सहभागी होत असत. वडील रतनसिंग हे इलेक्ट्रिकलचे काम करतात.

कर्तृत्व, चिकाटी आणि जनसंपर्काच्या बळावर त्यांनी पुण्यासारख्या महानगरात स्वतःची वेगळी ओळख निर्माण केली. सिंहगड रोड परिसरातून त्या तिसऱ्यांदा नगरसेवक म्हणून निवडून आल्या असून, यंदा त्यांची बिनविरोध निवड झाली होती. त्याच वाटचालीतून आता महापौरपदाचा सन्मान शिरूरच्या लेकीला मिळणार असल्याची बातमी समजताच, त्यांच्या आईच्या घराजवळील यशवंतराव चव्हाण चौकात नागरिकांनी एकत्र जमून आनंद व्यक्त केला.

“शिरूरकरांचा मोठा सन्मान झाला आहे,” अशी भावना सर्वत्र व्यक्त होत असून, गावातून महानगरापर्यंत मजल मारणाऱ्या मंजुषा नागपुरे यांचा प्रवास अनेक तरुणींना प्रेरणा देणारा ठरत आहे. शिरूरच्या मातीतून घडलेली ही नेतृत्वकथा आता पुण्याच्या कारभाराला नवी दिशा देईल, अशी अपेक्षा व्यक्त होत आहे.

 दरम्यान शिरूर येथील यशवंतराव चव्हाण सामाजिक सांस्कृतिक व शैक्षणिक प्रतिष्ठानचे अध्यक्ष संजय बारवकर यांनी सांगितले की शिरूरची लेक व यशवंतराव चव्हाण चौक परिसरात राहणाऱ्या परदेशी कुटुंबाची कन्या मंजुषा नागापुरे यांचा शिरूरकरांच्या वतीने जाहीर नागरी सत्कार करण्यात येणार असल्याचे त्यांनी सांगितले.