ज्येष्ठ गांधीवादी नेते माणिकचंद ओस्तवाल यांचे निधन

शिरूर { डेली न्यूज पोस्ट टीम 24}: कारेगाव (ता. शिरूर) येथील जुन्या पिढीतील नेते, ज्येष्ठ गांधीवादी विचारवंत, समाजसेवक आणि उद्योजक माणिकचंदजी ताराचंदजी ओस्तवाल{ काकाजी }(वय १०४) यांचे वृद्धापकाळाने निधन झाले. त्यांच्या निधनाने कारेगावसह परिसरातील सामाजिक, धार्मिक व राजकीय क्षेत्रात हळहळ व्यक्त करण्यात येत आहे. माणिकचंद ओस्तवाल हे गांधीवादी विचारांचे कट्टर अनुयायी होते. त्यांनी आयुष्यभर सामाजिक बांधिलकी जपत विविध धार्मिक, सामाजिक आणि सार्वजनिक उपक्रमांमध्ये सक्रिय सहभाग नोंदविला. त्यांच्या शांत, संयमी व सर्वसमावेशक स्वभावामुळे परिसरात त्यांना विशेष मानाचे स्थान होते.

त्यांच्या पश्चात दोन मुले, सहा मुली, सुना, जावई, नातवंडे असा मोठा परिवार आहे. उद्योजक प्रवीण ओस्तवाल व सुनील ओस्तवाल यांचे ते वडील होत. माजी सरपंच पुष्पलत्ता ओस्तवाल यांचे ते सासरे, तर आशिष ओस्तवाल, गणेश ओस्तवाल व सुमित ओस्तवाल यांचे ते आजोबा होत.

त्यांच्या निधनाची वार्ता समजताच विविध क्षेत्रातील मान्यवरांनी ओस्तवाल कुटुंबीयांची भेट घेऊन श्रद्धांजली अर्पण केली.

त्यांची अंत्ययात्रा शनिवार (दि. १३ जून) रोजी सायंकाळी ६.३० वाजता कारेगाव येथील राहत्या घरापासून निघून कारेगाव अमरधाम येथे जाईल.