कराओके संगीत मैफिलीने शिरूरकरांना स्वरांची अविस्मरणीय मेजवानी; उदयोन्मुख कलाकारांच्या सादरीकरणाला उत्स्फूर्त दाद

शिरूर { डेली न्यूज पोस्ट टीम -24,}ओंकार संगीत विद्यालयाचे संचालक गणेश मराठे आणि त्यांच्या विद्यार्थ्यांनी सादर केलेल्या कराओके संगीत मैफिलीने शिरूरकर रसिकांना अक्षरशः मंत्रमुग्ध केले. राजभोग बँक्वेट हॉल येथे आयोजित या मैफिलीत जुन्या-नव्या लोकप्रिय हिंदी गीतांचे सुरेल सादरीकरण झाले. उपस्थित रसिकांनी टाळ्यांच्या कडकडाटात कलाकारांना भरभरून दाद दिली.

कार्यक्रमाची सुरुवात मान्यवरांच्या हस्ते श्रीगणेश प्रतिमेचे पूजन करून करण्यात आली. यावेळी विद्याधाम प्रशालेचे माजी मुख्याध्यापक व्ही. डी. कुलकर्णी, शिरूर तालुका ब्राह्मण सभेचे अध्यक्ष अरुण महाराज उंबरेकर, डेक्कन स्कूलचे प्राचार्य डॉ. समीर ओंकार, पोदार इंटरनॅशनल स्कूलचे प्राचार्य नीरज राय आणि ॲड. सीमा काशीकर उपस्थित होते.

गणेश मराठे यांनी सादर केलेल्या ‘प्रथम नमो गिरिजासूत गणपती’ या भक्तिगीताने मैफिलीची सुरुवात झाली. त्यानंतर कीगा आईस्क्रीमचे संचालक किरण साळुंखे यांनी ‘ऐ शाम मस्तानी’ हे गीत सादर करून उपस्थितांची मने जिंकली. पुढे ‘छप्पा छप्पा चरखा चले’, ‘तुमसे मिलने की तमन्ना है’, ‘सागर जैसी आँखोंवाली’, ‘क्या हुआ तेरा वादा’, ‘जा रे उड जा रे पंछी’, ‘रिमझिम रिमझिम’, ‘कौन है जो सपनों में आया’, ‘मैने प्यार किया’, ‘और इस दिल में क्या रखा है’, ‘पहला नशा’ आणि ‘गजब का है दिन’ यांसारख्या लोकप्रिय गीतांची एकापाठोपाठ एक सादरीकरणे झाली.

या कार्यक्रमात गणेश मराठे, केतन गोसावी, गोपाल भावसार, किरण साळुंखे, नितीन मामीडवार आणि प्रीतम पारधी यांनी आपल्या सुमधुर आवाजातून विविध गाणी सादर करून रसिकांची वाहवा मिळवली.

मैफिलीचे आणखी एक वैशिष्ट्य म्हणजे डेक्कन स्कूलचे प्राचार्य डॉ. समीर ओंकार, पोदार इंटरनॅशनल स्कूलचे प्राचार्य नीरज राय, शिरूर विकास आघाडीचे अध्यक्ष ॲड. सुभाष पवार आणि बालाजी विद्यालयाचे प्राचार्य विनायक म्हसवडे यांनीही रंगमंचावर येत उत्स्फूर्तपणे गाणी सादर केली. त्यांच्या सादरीकरणाला उपस्थितांनी टाळ्यांच्या गजरात प्रतिसाद दिला.

कार्यक्रमाच्या समारोपप्रसंगी ओंकार संगीत विद्यालयाचे संचालक गणेश मराठे यांनी भविष्यातही अशा नावीन्यपूर्ण संगीत मैफिली आणि कलाविषयक उपक्रम नियमितपणे आयोजित करण्यात येतील, अशी माहिती दिली.