आंधळगाव येथे भीषण अपघात; ऊसतोड कामगाराच्या वाहनास कंटेनरची धडक, दोघांचा मृत्यू

शिरूर { डेली न्यूज पोस्ट टीम 24}: आंधळगाव परिसरातील न्हावरा-चौफुला मार्गावर रविवारी पहाटे झालेल्या भीषण अपघातात ऊसतोड कामगारांना घेऊन जाणाऱ्या महिंद्रा पिकअपला भरधाव कंटेनरने जोरदार धडक दिल्याने दोन जणांचा मृत्यू झाला, तर १२ जण गंभीर व किरकोळ जखमी झाले. या प्रकरणी शिरूर पोलीस ठाण्यात कंटेनर चालकाविरुद्ध गुन्हा दाखल करण्यात आला आहे.

याबाबत पोलिसांनी दिलेल्या माहितीनुसार, दादा गंगाराम पवार (वय ३०, रा. राहू, ता. दौंड) यांनी फिर्याद दिली आहे. रविवारी (दि. १० मे) पहाटे सुमारे ५.२० वाजण्याच्या सुमारास आंधळगाव हद्दीतील सीएनजी पंपासमोर न्हावरा-चौफुला रोडवर हा अपघात घडला. महिंद्रा पिकअप (एमएच ४२ बीएफ ०६९९) या वाहनाच्या मागील हौद्यात ऊसतोड कामगार बसलेले असताना अशोक लेलंड कंपनीचा कंटेनर (एमएच १२ एनएक्स २९१९) भरधाव वेगात येऊन पिकअपला धडकला.

या अपघातात संगीता सुनील मोरे (वय ३५, रा. घोडदे, ता. साक्री, जि. धुळे) यांचा केडगाव येथील रुग्णालयात उपचारादरम्यान मृत्यू झाला, तर रविन सखाराम सोनवणे (वय ४५, रा. घोडदे, ता. साक्री, जि. धुळे) यांचा न्हावरा ग्रामीण रुग्णालयात उपचारापूर्वीच मृत्यू झाला. तसेच सीमा मोरे, देविका पाडवी, मुल्या माळी, साहिल माळी, काजल माळी, जुगरी पाडवी, इंदुबाई माळी, सुरेखा मोरे, नरेश मोरे, सोनेबाई पवार, दीपक पाडवी आणि सुरेश पाडवी हे जखमी झाले आहेत.

जखमी कामगारांपैकी काही जण धुळे जिल्ह्यातील साक्री तालुक्यातील घोडदे येथील, तर काही नंदुरबार जिल्ह्यातील चौपडा तालुक्यातील असून सध्या दौंड तालुक्यातील डुबेवाडी येथे वास्तव्यास होते.

कंटेनर चालक अनिल सुभाष वानखेडे (रा. खामगाव, जि. बुलढाणा) याने वाहन हयगयीने व वाहतुकीच्या नियमांकडे दुर्लक्ष करून चालविल्याचा आरोप फिर्यादीत करण्यात आला आहे. अपघातानंतर चालकाने घटनास्थळावर न थांबता पलायन केल्याचेही पोलिसांनी सांगितले.

या प्रकरणी शिरूर पोलीस ठाण्यात भारतीय न्याय संहिता कलम १०६(१), १२५(अ), १२५(८), २८१, ३२४(४) तसेच मोटार वाहन कायदा कलम १८४, १३४/१७७ अन्वये गुन्हा दाखल करण्यात आला आहे. पुढील तपास पोलीस निरीक्षक संदेश केंजळे यांच्या मार्गदर्शनाखाली पोलीस उपनिरीक्षक कदम करीत आहेत.