ज्येष्ठ इतिहास अभ्यासक माजी प्राचार्य डॉ. बी. डी. कुलकर्णी यांचे निधन

शिरूर { डेली न्यूज पोस्ट टीम 24}ज्येष्ठ इतिहास अभ्यासक व भारत इतिहास संशोधन संस्थेचे उपाध्यक्ष माजी प्राचार्य डॉ. बी. डी. कुलकर्णी वय -७८ यांचे निधन झाले . त्याच्या पश्चात पत्नी, बंधू, मुलगा, असा परिवार आहे.

डॉ. बी. डी. कुलकर्णी यांनी चांदमल ताराचंद बोरा महाविद्यालयात 28 वर्ष इतिहास अध्यापनाचे काम केले. या काळात महाविद्यालयाच्या विविध समित्यांमध्ये त्यांनी मोलाचे योगदान दिले. इतिहास विभाग प्रमुख म्हणून कार्यरत असतानाच 1994-95 मध्ये त्यांनी प्राचार्य पद भूषविले. यानंतर जून 2001 मध्ये ते कला वाणिज्य महाविद्यालय पेठ जिल्हा नाशिक या ठिकाणी प्राचार्य पदी नियुक्त झाले. या ठिकाणी दहा वर्ष प्राचार्य पदाची धुरा यशस्वीपणे सांभाळल्यानंतर ते 2010 मध्ये निवृत्त झाले. त्यानंतर टिळक महाराष्ट्र विद्यापीठाचे अधिष्ठाता म्हणून त्यांनी अनेक वर्ष काम पाहिले.
इतिहासाचे अभ्यासक, महाराष्ट्र इतिहास परिषदेच्या खजिनदार पदापासून ते अध्यक्षपदापर्यंतच्या सर्व जबाबदाऱ्या यशस्वीपणे त्यांनी पार पाडल्या. महाराष्ट्र इतिहास परिषदेचा बुलंद आवाज म्हणून त्यांच्याकडे पाहिले जात होते. इतिहास विषयाशी संबंधित असलेल्या सर्व संस्थांची त्यांचे निकटचे संबंध होते. भारत इतिहास संशोधक मंडळाचे उपाध्यक्ष म्हणून सध्या ते कार्यरत होते. त्यांच्या जाण्याने इतिहास क्षेत्राची कधीही भरून न निघणारी हानी झालेली आहे. एक उत्कृष्ट इतिहास संशोधक व उत्तम संघटक या नात्याने त्यांची आठवण कायम स्मरणात राहील .
वैद्यकीय व्यवसाय डॉ. देवदत्त कुलकर्णी यांचे ते वडील तर संजय कुलकर्णी यांचे ते बंधू होत.
प्राचार्य महासंघाचे माजी अध्यक्ष नंदकुमार निकम बोरा महाविद्यालयाचे प्राचार्य डॉ. के. सी. मोहिते, उपप्राचार्य हरिदास जाधव यांनी कुलकर्णी यांच्या निधनाबद्दल शोक व्यक्त करून आदरांजली वाहिली आहे.
एक अभ्यासू संशोधक, विद्यार्थी प्रिय शिक्षक,प्रभावी वक्ते आणि कुशल संघटक अशी त्यांची ओळख होती. त्यांच्या जाण्याने इतिहास क्षेत्रात मोठी पोकळी निर्माण झाली आहे.

अंत्यविधी
शनिवार दिनांक 11/04/2026 रोजी साडेतीन वाजता वैकुंठ स्मशानभूमी पुणे येथे होईल.